कर्णालीमा घट्‍न थाल्‍यो पानीको वहाब

कैलाली- लगातार पाँच दिनदेखि परिरहेको वर्षाका कारण बढ्दै गएको कर्णाली नदी वर्षा रोकिएसँगै घट्न थालेको छ । सोमबार बिहान ७:३० बजे गरिएको मापनमा कर्णाली नदीको चिसापानी क्षेत्रमा पानीको सतह १२ दशमलव १९८ मिटर रहेकोमा ८:३० बजे मापन गर्दा घटेर ११ दशमलव ८८१ मिटर रहेको छ ।

पानी घट्दै गए पनि खतराको तहमै रहेका कारण नदी तटिय क्षेत्रका बासिन्दालाई सचेत रहन आग्रह गरिएको जिल्ला प्रशासन कार्यालय कैलालीका सूचना अधिकारी शिवराज जोशीले बताए । 

गेजरिडर पार्वती गुरुङका अनुसार १० मिटरलाई सचेत मानिन्छ भने १० दशमलव ८० मिटरलाई खतराको सतह मानिन्छ । 

टीकापुर नगरपालिका-५ शाहीपुरमा कर्णालीको बाध फुटेर पानी बस्तिमा प्रवेश गरेपछि त्यदको मर्मत कार्य थालिएको छ ।

जिल्ला प्रशासन कार्यालय कैलालीका सूचना अधिकारी जोशीले टीकापुरमा करीब ४५० घर परिवारलाई र जानकी गाउँपालिकाका करिब १० घरधुरीलाई सुरक्षित स्थानमा सारिएको बताए ।