नाराबाजीबीच अन्त्य भयो प्रदेश १ को हिउँदे अधिवेशन

विराटनगर : नाराबाजीबीच प्रदेश नम्बर १ को प्रदेशसभाको हिउँदे अधिवेशन अन्त्य भएको छ । आइबार सभामुख प्रदिप भण्डारीले  बैठक शुरु गर्न साथ विपक्षी दलका सांसदले उठेर विरोध गरेका थिए । सभामुखले पटक पटक बस्न आग्रह गरेपनि उनीहरुले बस्न मानेनन् ।  धेरैपटक बस्न आग्रह गरेपनि बस्न नमानेपछि सभामुखले प्रदेश प्रमुखको कार्यालयबाट हिउँदे अधिवेशन अन्त्य भएको पत्र वाचन गरेर सुनाए ।

सभामुखले पत्र वाचन गरिरहदा सांसदहरुले नाराबाजी गरेका थिए । सरकारले प्रदेश सभाको हिउँदे अधिवेशन आइतबार राति १२ बजे अन्त्य गर्ने निर्णय गरेको छ । बैठकमा कुरा राख्न सभामुख प्रदिपकुमार भण्डारीले समय दिएपछि प्रमुख विपक्षी कांग्रेसका केदार कार्कीले सरकारको जवाफ आउनु पर्ने माग गरेका थिए ।

यसबीच विपक्षी दलका सांसदले सरकारले जवाफ दिनुपर्ने मागसहित नारावाजी गरेका थिए । विपक्षीले उठाएको मागको सम्बन्धमा मुख्यमन्त्री शेरधन राईले जवाफ भने दिएनन् । सभामुख भण्डारीले सदनमा मुख्यमन्त्रीको उपस्थिति रहेकोले विपक्षीको कुरा सम्बोधन हुने जनाउ दिएका थिए । 

प्रदेशसभाको सातौँ तथा हिउँदे अधिवेशन गत माघ ७ गते शुरु भएको थियो । त्यसयता जम्मा आठ पटक मात्र बैठक बस्यो । सरकारले अधिवेशनभरी कुनै पनि विधेयक सदनमा छलफल गराएनन् । 

तत्कालीन नेकपाभित्रको विवाद अनि सरकार ढाल्ने र नयाँ बनाउने प्रयासले प्रदेशसभा समेत प्रभावित बन्न पुग्यो । पछिल्लो पटक सरकारले विनियोजन गरेका बजेट, दीर्घकालीन महत्वका योजना भएको प्रगति, निर्वाचन क्षेत्र पूर्वाधार विकास कार्यक्रमलगायत विषयमा सरकारको जवाफ माग्दै विपक्षी दलले प्रदेशसभा बैठक अवरोध गर्दै आएका थिए ।