सिटिनेट बैठकका लागि नगरप्रमुख लामा मलेसिया प्रस्थान

मकवानपुर- सिटिनेटको बैठकको शिलशिलामा हेटौडा उपमहानगरपालिकाका नगरप्रमुख मिनाकुमारी लामा मलेसिया प्रस्थान गरेकी छन् ।

मलेसियाको राजधानी क्वालालाम्पुरमा हुने मानव बस्ती व्यवस्थापनको लागि प्रतिबद्ध शहरी सरोकारवालाहरूको संस्था 'सिटिनेट’ को अन्तर्राष्ट्रिय सम्मेलनमा सहभागी हुन नगरप्रमुख लामा मलेसिया गएकी हुन् ।

उनलाई हेटौडा उपमहानगरपालिकाका उपप्रमुख राजेश बानियाँ, प्रमुख प्रशासकीय अधिकृत शिवराज चौलागाईंले बिदाई गरेका छन् । आइतबार काठमाडौँ गएपछि सोमबार दिउँसोको हवाई यात्राबाट नगरप्रमुखकाे मलेसिया प्रस्थान गर्ने कार्यसूची रहेको नगरप्रमुखको सचिवालयले जनाएको छ । प्रमुख लामा १ सय ३५ भन्दा बढी मुलुकका नगरपालिका, गैरसरकारी संस्था निजी कम्पनी र अनुसन्धान केन्द्रहरूको साझा संस्था सिटिनेटको नवौं सभामा सहभागी हुने बताइएको छ ।

सिटिनेटको नेपाल च्याप्टरको अध्यक्ष रहेको हेटौडा उपमहानगरपालिकासहित १६ वटा स्थानीय तह र विभिन्न संस्थाको नेतृत्व गर्दै नगरप्रमुख लामा मलेसिया गएकी हुन् । सभा असोजको ४ देखि ७ गतेसम्म सञ्चालन हुने कार्यतालिका रहेको छ । सभामा जानुपूर्व सिटिनेटको सदस्य रहेका नेपालका स्थानीय तह र समाजिक संघसस्थाको हेटौडामा बैठक सञ्चालन गरिएको थियो । हेटौडा उपमहानगरपालिकाको आतिथ्यतामा भएको बैठकमा ललितपुर महानगरपालिकाका प्रमुख चिरीबाबु महर्जनले नवौं सभामा उम्मेदवारीको घोषणा गरेका थिए ।

अन्तर्राष्ट्रिय सम्मेलनमा सहभागी हुन जाने तयारीपछि नगरप्रमुख लामाले कार्य जिम्मेवारी उपप्रमुख बानियाँलाई दिएकी छन् ।