भुटानलाई पराजित गर्दै बंगलादेश साफको फाइनलमा

काठमाडौँ- बंगलादेश साफ महिला च्याम्पियनसीप फुटबलको फाइनलमा प्रवेश गरेको छ । त्रिपुरेश्वरस्थित दशरथ रंगशालामा भएको पहिलो सेमिफाइनलमा भुटानलाई ८-० गोलअन्तरले पराजित गर्दै बंगलादेश फाइनलमा प्रवेश गरेको हो ।

बंगलादेश दोस्रो पटक च्याम्पियनसीपको फाइनलमा प्रवेश गरेको हो । यसअघि चौँथो संस्करणमा फाइनलमा बंगलादेशले भारतसँग ३-१ को पराजय भोगेको थियो ।

यसपटक फाइनल पुर्‍याउन बंगलादेशका लागि कप्तान सबिना खातुनले ह्यट्रिक गोल तथा मोसामत सोपना, श्रीमोती सरकार, तोहुरा खातुन, मासुरा प्रविण र रितु पोर्नाले एक-एक गोल गरे ।

च्याम्पियनसीप अन्तर्गत सबिनाको यो आठौँ गोल हो र उनी गोल्डेन बुटको सबैभन्दा बलियो दावेदार समेत बनेकी छन् ।

बंगलादेशले अब भारत र नेपालबीच हुने दोस्रो सेमिफाइनलको विजेतासँग खेल्नेछ ।