पारसले त्रिकोणात्मक श्रृंखला गुमाउने

तस्बिर खड्काको फेसबुकबाट ।

काठमाडौँ: पारस खड्काले शनिबारबाट सुरु हुने त्रिकोणात्मक टि-ट्वान्टी श्रृंखला गुमाउने भएका छन् । आइतबार अभ्यासका क्रममा काँधको चोट बोकपछि पारसले नेपाल, मलेसिया र नेदरल्यान्ड्स सम्मिलत श्रृंखला नखेल्ने भएका हुन् ।

पारसले सामाजिक सञ्जालमार्फत आफूले अबको दुईदेखि तीन साताका आराम र फिजियोथेरापीमा रहने बताएका छन् । आफू मैदानमा नरहने भए पनि नेपाली टिम यस श्रृंखला जित्न सक्षम रहेको विश्वास व्यक्त गरेका छन् । 

त्रिकोणात्मक टि-ट्वान्टी श्रृंखला कीर्तिपुरस्थित त्रिभुवन विश्वविद्यालयको क्रिकेट मैदानमा हुँदैछ । प्रतियोगिताका लागि ज्ञानेन्द्र मल्लको कप्तानीमा नेपाली टिम घोषणा गरिसकिएको छ । 

शृंखलाको उद्घाटन खेलमा घरेलु टिम नेपाल र नेदरल्यान्ड्स भिड्नेछन् । बैशाख ५ मा हुने दोस्रो खेलमा नेदरल्यान्ड्स र मलेसिया आमनेसामने हुनेछन् । 

त्यसैगरी, बैशाख ७ मा नेपालले फेरि नेदरल्यान्ड्सको चुनौति सामना गर्नेछ । बैशाख ८ मा मलेसिया र नेदरल्यान्ड्स खेल्नेछन् अनि बैशाख ९ मा मलेसिया र आयोजक नेपाल दोस्रो मलेसिया दोस्रो पटक भिड्नेछन् । डबल राउण्ड रोबिनको आधारमा हुने शृंखलामा शीर्ष दुईमा रहने टिम उपाधिका लागि प्रतिस्पर्धा गर्नेछन् ।

खेल तालिका
वैशाख ४ नेपालविरुद्ध नेदरल्यान्ड्स
वैशाख ५ नेदरल्यान्ड्सविरुद्ध मलेसिया
वैशाख ६ नेपालविरुद्ध मलेसिया
वैशाख ७ नेपालविरुद्ध नेदरल्यान्ड्स
वैशाख ८ नेदरल्यान्ड्सविरुद्ध मलेसिया
वैशाख ९ नेपालविरुद्ध मलेसिया
वैशाख १० विश्राम
वैशाख ११ फाइनल