मकवानपुरमा थपिए ९८ जना डेंगु संक्रमित

मकवानपुर- पछिल्लाे २४ घण्टामा मकवानपुरमा ९८ जनामा डेंगु संक्रमित पुष्टि भएकाे स्वास्थ्य कार्यालयले जनाएकाे छ । योसँगै जिल्लामा डेंगु संक्रमितको संख्या १ हजार ४ सय २९ पुगेको छ । 

मकवानपुर जिल्लाको १० पालिका मध्ये ८ पालिकामा डेगुंका बिरामी भेटिएकाे स्वास्थ्य कार्यालयका लक्ष्मण घिमिरेले जानकारी दिए । जिल्लाकाे हेटौंडा उपमहानगरपालिकामा सबैभन्दा बढी डेंगु संक्रमित भेटिएका छन् । स्वास्थ्य कार्यालयले दिएको तथ्याङ्कअनुसार हेटौंडा उपमहानगरपालिकामा १ हजार ३ सय ५५ जना, मकवानपुरगढी गाउँपालिकामा १९, थाहा नगरपालिकामा १७ जनामा डेंगु संक्रमित भेटिएका छन् ।

यसैगरी मनहरी गाउँपालिकामा १७, भिमफेदी गाउँपालिकामा ११, बकैया गाउँपालिकामा ५, बागमती गाउँपालिकामा ३ र राक्सिराङ गाउँपालिकामा १, कैलाश गाउँपालिकामा १ जनामा डेंगु संक्रमित भेटिएको घिमिरेले बताए । हालसम्म इन्द्रसरोवर गाउँपालिकामा भने डेंगु संक्रमित भेटिएका छैनन् । हालसम्म हेटाैंडा उपमहानगरपालिकाका १ जनाकाे संक्रमणबाट मृत्यु भएकाे छ । 

डेगुं सङ्क्रमित बिरामीले मकवानपुरका सरकारी अस्पतालसहित निजी अस्पताल डेगुंका बिरामीले भरिएकाे स्वास्थ्य कार्यालयले जनाएकाे छ । सरकारी अस्पताल हेटौंडा अस्पताल तथा चुरेहिल, सहकारी, सन्चो, सिटी लगायतका निजी अस्पतालमा डेगुंका बिरामीले भरिएकाे सूचना अधिकारी घिमिरेले बताए । गम्भीर प्रकृतिका बिरामीलाई छिमेकी जिल्ला चितवन र काठमाडौँको अस्पतालमा रिफर गरिएको उनले बताए । उनका अनुसार कुन अस्पतालमा कति कति छन्, बिवरण आएको छैन ।

उपमहानगरकाे डेंगु नियन्त्रण अभियान 

हेटाैंडा उपमहानगरपालिका क्षेत्रमा डेंगुका बिरामी बढ्दै गएपछि उपमहानगरपालिकाबाट थालिएकाे स्प्रे अभियान नगरका विभिन्न वडाहरूमा चलिरहेकाे उपमहानगरपालिका कार्यालयले जनाएको छ । उपमहानगरपालिकाकाे जनस्वास्थ्य शाखाका अनुसार अहिलेसम्म हेटौंडा उपमहानगरपालिकाका १, २, ३, ४, ५, १८ र १९ नम्बर वडामा डेंगु नियन्त्रणका लागि नियमित रूपमा स्प्रे गर्दै आएको छ । 

डेंगु संक्रमण दर बढ्दै गएपछि नगर प्रहरी लगायतकाे जनशक्ति परिचालन गरी स्प्रे अभियानलाई एक महिनादेखि निरन्तर सञ्चालन गरिरहेकाे हेटौंडा उपमहानगरपालिकाले जनाएकाे छ । हेटौंडा उपमहानगरपालिका जनस्वास्थ्य निरीक्षक भोला चौलागाईंका अनुसार संक्रमण बढ्दै गएपछि लामखुट्टेका लार्भा तथा अन्य जीवाणु नष्ट गर्ने गरी औषधि छर्कन थालिएको हो । संक्रमण फैलन नदिन जनस्तरमा मट्टीतेल प्रयोग गरी लार्भा नष्ट गर्न सचेतनासँगै बढी जोखिम रहेका क्षेत्रमा उपमहानगरले स्प्रे गर्न थालेको उनले जानकारी दिए । 

संक्रमण फैलिएका वडाको जोखिमपूर्ण क्षेत्र पहिचान गरी आवश्यकतानुसार संक्रमण नियन्त्रण अभियान सञ्चालन गरिने जनस्वास्थ्य अधिकृत चौलागाईंले बताए । असार अन्तिमबाट सुरु भएको संक्रमणदर बिस्तारै बढ्दै गएको हाे । हेटौंडा उपमहानगरका बजार क्षेत्रमा पर्ने ४ र ५ वडामा बढी बिरामी देखिएको स्वास्थ्य कार्यालयले जनाएको छ । बिरामीको संख्या बढ्दै जानुले सतर्कता, सुरक्षा तथा सचेतना आवश्यक रहेको बताइएको छ ।