सभामुखलाई टिकटका लागि बस्नेतसँगै आफ्नै भतिज बाधक

काठमाडौँ- आगामी मंसिर ४ गते हुने संघीय र प्रदेश निर्वाचनका लागि सिन्धुपाल्चोक संघीय क्षेत्र न १ बाट सभामुख अग्निप्रसाद सापकोटा सिफारिस भए । माओवादी केन्द्र सिन्धुपाल्चोकले उनको नाम नम्बर १ मा राखेर सिफारिस गरे पनि टिकटको सवालमा भने त्यति सहज देखिँदैन ।

उता गठबन्धनबाट नेपाली कांग्रेसका केन्द्रीय सदस्य मोहनबहादुर बस्नेत अवरोध बनेका छन् भने माओवादीबाट सभामुखकै भतिज माधव सापकोटा ‘सुवोध’ बीचमा उभिएका छन् । सुवाेध माओवादीका केन्द्रीय सदस्य हुन् । माओवादीबाट सुवोध पनि यस क्षेत्रमा सिफारिस हुनुका साथै उनको दाबी रहेका कारण सभामुख सापकोटाले टिकट पाउने सवालमा टिकाटिप्पणी हुन थालेको छ ।

२०६४, २०७० र २०७४ सालको निर्वाचनमा माओवादीको तर्फबाट उम्मेदवार बनेर जितको ह्याट्रिक गरेर सापकोटा सभामुखसमेत भए । र, पनि सापकोटाले यसपटक उम्मेदवार भएर फेरि जित्ने दाऊमा छन् । उनको मनस्थितिमा अवरोध बनेर उभिएका छन् सुवोध । पटक-पटक मन्त्री र सभामुख भएर पनि सिन्को नभाँचेको आरोप खेप्दै आएका सभामुख सापकोटाले टिकट पाइहाले पनि जित निकाल्न भने त्यति सहज नहुने सिन्धु राजनीतिक वृत्तमा चर्चा सुरू भइसकेको छ । बरु सुवोधलाई भने जित्न सहज हुनसक्ने आँकलन सिन्धुपाल्चोकमा छ ।

त्यसो त पटक-पटक काका सभामुख सापकोटाकै कारण आफ्नो राजनीतिक भविष्य अन्यौल रहेको निष्कर्ष निकाल्दै भतिज सुवाेधले यसपटक पनि काकाको नाउँमा फेरि सती जान नसक्ने बताउँदै आएका छन् । उनले हरतरहले टिकट आफूले पाउनका लागि वातावरण बनाउँदै गएको र अन्तिममा यस विषयलाई लिएर काका सभामुख सापकोटासँग वार्ता गर्ने मुडमा रहेको उनीनिकट कार्यकर्ताहरू बताउँछन् । 'अब युवालाई मौका दिएर अग्नि सर समानुपातिकमा बस्नु भयो भने राम्रो हुन्छ,' एक कार्यकर्ताले भने । ती कार्यकर्ताकै जस्तै माओवादी सिन्धुपाल्चोकभित्र पनि अधिकांश कार्यकर्ताको चाहना सभामुख सापकोटा समानुपातिकमा बसेर संरक्षकको भूमिकामा रहोस् भन्ने छ तर सभामुख सापकोटा यसपटक पनि उम्मेदवार बन्ने मुडमा छन् ।

अग्नि पार्टी अध्यक्ष पुष्पकमल दाहाल ‘प्रचण्ड’का निकै नजिकका मानिन्छन् । त्यसैले पनि अग्निलाई टिकट आफ्नो नाममा ल्याउन सहज छ । अग्निको क्षेत्र सिन्धुपाल्चोक–१ पछिल्लो समयदेखि माओवादीले जित्दै आएको छ । गठबन्धनको आन्तरिक सहमति पनि यसअघि जितेको ठाउँमा सोही पार्टीलाई दिने भन्ने छ ।
फेरि, यो क्षेत्रमा अग्निले टिकट ल्याएमा जितका लागि उही भतिज सुवोधको सहयोग अपरिहार्य हुन्छ । यसअघिका सबै निर्वाचनमा सुवोधको भूमिका अब्बल रहँदै आएको पनि हो । सुवाेध भुईं तहलाई कार्यकर्ता तथा नागरिकले समेत चिन्दछन् । उनी गाउँमै रहेर राजनीति गर्ने नेता हुन् । ग्रास लेबलका जनतासँग पनि राम्रो सम्वन्ध भएका कारण पनि सुवाेधको सहयोगबिना सभामुख सापकोटाको विजय भने सम्भव छैन ।

सभामुख सापकोटाको उम्मेदवारको बाटोमा भतिज सुवाेध मात्र हैनन् नेपाली काँग्रेसका केन्द्रीय सदस्य मोहन बस्नेत पनि तगारो छन् । पाँच दलीय गठबन्धन भए पनि नभए पनि सो क्षेत्रमा आफूले कुनै पनि हालतमा नछाड्ने अडान बस्नेतले राख्दै आएकाले पनि अग्निलाई सकस छ ।

पूर्व मन्त्रीसमेत भइसकेका बस्नेतको सभापति शेरबहादुर देउवासँग राम्रो सम्वबन्ध छ । त्यही सम्बन्धका कारण पनि बस्नेत टिकट पाउनका लागि हात धोएर पछि लागेका छन् भने सभामुख सापकोटालाई जिताउन आफू बलिको बोका नबन्ने उनले बताउँदै आएका छन् । नेपाली काँग्रेसबाट गठवन्धनको नाउँमा यसपटक टिकट पाएन भने आफू स्वतन्त्र रूपमा उम्मेदवार हुने सार्वजनिक अभिव्यक्ति पनि उनले दिँदै आएका छन् । सिन्धुपाल्चोक–१ कांग्रेसको पकड भएको क्षेत्र हो । यहाँ माओवादीको भन्दा कांग्रेसको मत दोब्बर छ । यो स्थानीय तहको परिणामले देखाएको हो ।

यता बस्नेतलाई समानुपातिकमा राखेर सभामुख सापकोटालाई गठबन्धनको साझा उम्मेदवार बनाउने कसरत भएको भन्दै बस्नेत समर्थित कार्यकर्ताहरूले बस्नेतलाई नै टिकट दिनुपर्छ भनेर सभापति एवम् प्रधानमन्त्रीलाई ज्ञापनपत्र बुझाउने र सामाजिक सञ्जालमार्फत दबाब सिर्जना गर्नै जस्ता क्रियाकलापलाई तीव्रता दिएको छ ।
सभामुख सापकोटा र बस्नेत मध्य कसले टिकट हात पार्ला त्यो त गठबन्धनले निर्णय गर्ने नै छ । तर, सशस्त्र युद्धको प्रारम्भबाट नै काका अग्निप्रसाद सापकोटासँगै युद्धमा होमिएका र काका सापकोटालाई जिताउन हरेकपटक आफ्नो राजनीतिक भविष्य नै दाऊमा राख्दै आएका सुवोधमध्ये कसले टिकटमा बाजी मार्ला त्यो भने सिन्धुवासीका लागि चासोको विषय बनेको छ । काकाकै कारण सुवाेध यसअघि ब्याक हुँदै आएका थिए ।

उनका समकक्षीहरू सांसद भए । मन्त्री भए । तर, उनले माओवादीमा खास अवसर पाएका छैनन् । त्यसै कारण उनी यसपटक अगाडि बढ्ने मनसायमा छन् ।