गणित शिक्षकको नतिजा : माग संख्याभन्दा कम शिक्षक अन्तर्वार्ताका लागि छनौट

काठमाडौँ- शिक्षक सेवा आयोगले माध्यमिक तहको गणित विषयको परीक्षाफल प्रकाशित गरेको छ ।

गत चैत १५ र असार ९ गते लिइएको परीक्षाको नजिता बुधबार साँझ आयोगले सार्वजनिक गरेको हो । सबै प्रदेशमा गरी गणित विषयमा २९९ जना माग गरिएकोमा १५१ मात्र अन्तर्वार्ताका लागि छनौट भएका छन् ।

सबैभन्दा धेरै प्रदेश १ मा ७६ जना माग भएकामा जम्मा २८ जना मात्र अन्तर्वार्ताका लागि छनौट भएका छन् । प्रदेश १ मा १४० जना दोस्रो (विषयगत) परीक्षामा सहभागी भएका थिए ।

मधेशमा १७ जनाको लागि लिइएको परीक्षामा जम्मा १५ जना सहभागी थिए । त्यसमा पनि ४ जना मात्र अन्तर्वार्ताका लागि छनौट भएका छन् । त्यस्तै, बागमती प्रदेशमा भने ५९ जनाको कोटामा ५४ जना अन्तिम चरणमा पुग्न सफल भएका छन् । बागमतीमा १७७ जनाले विषयगत परीक्षा दिएका थिए ।

गण्डकी प्रदेशमा ५५ जनाको मागमा ३२ जना अन्तर्वार्ताका लागि छनौट भएका छन् । १५० जना विषयगत परीक्षामा सहभागी भएका थिए ।

लुम्बिनीमा ३७ जनाको कोटामा जम्मा १४ जना मात्र अन्तर्वार्ताका लागि छानिएका छन् । ७३ जनाले विषयगत परीक्षा दिएका थिए ।

कर्णालीमा २९ जनाको कोटामा जम्मा ८ जना अन्तर्वार्तासम्म पुगेका छन् । यहाँ ६१ जना विषयगत परीक्षामा सामेल थिए । यसैगरी सुदूरपश्चिम प्रदेशमा पनि १६ जनाको कोटामा ११ जना मात्र पास भएका छन् । ४५ जनाले विषयगत परीक्षा दिन पाएका थिए ।