गुल्मीमा झांक्रीलाई झड्का, समाजवादी र एमालेबीच पार्टी एकता

बुटवल - गुल्मीमा नेपाल कम्युनिष्ट पार्टी एमाले र नेकपा एकीकृत समाजवादी गुल्मीबीच पार्टी एकताको घोषणा गरिएको छ । सोमबार एमाले पार्टी कार्यालयमा पत्रकार सम्मलेनको आयोजना गरेर दुवै पार्टीबीच औपचारिक रुपमा पार्टी एकताको घोषणा गरिएको हो ।

नेकपा एमालेमा केन्द्रीय उप–महासचिव प्रदिप ज्ञवाली र सचिव गोकर्ण बिष्टको उपस्थितिमा नेकपा एमालेका जिल्ला इन्चार्ज दिनेश पन्थी र जिल्ला अध्यक्ष बालसिंह काउछा तथा एकीकृत समाजवादीका जिल्ला इन्चार्ज गणेश खनाल र अध्यक्ष नरेश भण्डारीले एकता पत्रमा हस्ताक्षर गरेका छन् । एकीकृत समाजवादीका सचिव रामकुमारी झांक्रीको गृह जिल्लामा समाजवादीका जिल्ला नेताहरुले पार्टी छाडेपछि चुनाव लड्ने तयारीमा जुटेकी उनलाई थप चुनौती थपिएको छ । 

एकीकृत समाजवादीका जिल्ला अध्यक्ष नरेश भण्डारीले बामपन्थी एकताको सन्देश गुल्मीबाट दिइएको दाबी गरे । भण्डारीले एमालेभित्रका केही मुद्दामा हिजो असहमति जनाएर अलग भएको एकीकृत समाजवादी पार्टीले एमसीसी, नागरिकता विधेयक, बामपन्थी एकता र उपलब्धिलाई बेवास्था गर्न थालेपछि नेकपा एमालेमा पुन समाहित भएको प्रतिक्रिया दिए ।

एकीकृत समाजवादीका जिल्ला इन्चार्ज खनाल र अध्यक्ष भण्डारीसहित युवासंघका केन्द्रीय सचिव हिमाल थापा, जिल्ला सचिवालय सदस्य मदन बिष्ट, मुसिकोट गाउँकमिटी अध्यक्ष मदनदिप घिमिरे लगायतका नेता एमालेमै फर्किएका हुन् ।