सामुदायिक विद्यालयमा बस किन्‍न बजेट

मकवानपुर- एकभन्दा बढी विद्यालय मर्ज भएका अवस्थामा मात्रै विद्यालय बस उपलब्ध गराउने कार्यविधिको कारण गतवर्ष बजेट फ्रिज भएपछि यस वर्ष सुधार गरिने भएको छ ।

चालु आर्थिक वर्षमा भने लचिलो कार्यविधि बनाएर सेवालाई सरल बनाउने प्रयास गरेको बागमती प्रदेशको सामाजिक विकास मन्त्रालयले जनाएको छ ।

सामाजिक विकास मन्त्रालय अन्तरगतको शिक्षा विकास निर्देशनालय हेटौंडाले चालु आर्थिक वर्षमा बागमती प्रदेशका सामुदायिक विद्यालयमा बस खरिदका लागि अनुदान रकम दिने तयारी गरिएको छ ।

प्रदेशका २७ वटा सामुदायिक विद्यालयमा बस खरिदका लागि अनुदान रकम दिने तयारी भएको हो । चालु आर्थिक वर्षको बजेट किताबमा २७ वटा सामुदायिक विद्यालयलाई बस खरिदका लागि रकम अनुदान दिने गरी बजेट छुट्याइएको शिक्षा विकास निर्देशनालय हेटौंडाका निमित्त निर्देशक पूर्णबहादुर दर्जीले जानकारी दिए ।

प्रदेशका विभिन्‍न जिल्लाका माध्यमिक तहका विद्यालयलाई २५ लाख रुपैयाँका दरले रकम दिन लागिएको हो । सामुदायिक विद्यालयमा पनि बसको व्यवस्था गर्न सकियो भने सामुदायिक विद्यालय पनि विद्यार्थीको रोजाइमा पर्ने मन्त्रालयको बुझाइ छ ।

बस खरिदका लागि बागमती प्रदेश सरकारले प्रत्येक वर्ष अनुदान रकम दिँदै आएको छ । गत आर्थिक वर्षमा बस खरिदका लागि प्रदेश सरकारले सामुदायिक विद्यालयलाई अनुदान रकम व्यवस्था गरेको भए पनि जटिल कार्यविधिका कारण बजेट फ्रिज भएको थियो ।