प्रभावकारी बन्दै छोरी–बुहारी छात्रवृत्ति कार्यक्रम

फाइल फोटो

सुर्खेत - कनका सुन्दरी गाउँपालिका–४ की लक्ष्मी बुढाले भौतिक निर्माणतर्फको तीन वर्षीय डिप्लोमा सिभिल इन्जिनीयरिङ पढाइ पूरा गरिन् ।  उनको घरको कमाइले मात्रै पढाइ पूरा गर्न सक्ने अवस्था थिएन । प्रदेश सरकारले आर्थिक वर्ष २०७५/७६ को आफ्नो नीति कार्यक्रममार्फत घोषणा गरेको छोरी–बुहारी छात्रवृत्ति कार्यक्रमले नै उनलाई उच्च शिक्षा हासिल गर्ने अवसर जुरेको थियो ।

छात्रवृत्तिको लागि आवदेन माग गरेको थाहा पाएपछि उनले आवेदन दिइन् । छात्रवृत्तिको लागि छनोटमा परेर कर्णाली प्राविधिक शिक्षालय (केटिएस) जुम्लाबाट भौतिक निमार्णतर्फ तीन वर्षीय डिप्लोमा सिभिल इन्जिनियरिङ पूरा गर्न सकेको उनी बताउँछन् । बुढा भन्छिन्, `प्रदेश सरकारको छात्रवृत्तिले आफूलाई अध्ययन गर्न सहज भयो, म जस्ता धेरै महिला यसमा सहभागी भएका छन्, सरकारको यो कार्यक्रम एकदमै राम्रो र दीर्घकालीन लाभदायक छ ।`

यस्तै, कालीकोटको पलाता गाउँपालिका–९ की विनिताकुमारी शाहीले पनि यसै कार्यक्रमबाट छात्रवृत्ति प्राप्त गरी सोही विषयको अध्ययन पूरा गरेकी छिन् । आर्थिक अवस्थाले प्राविधिक विषयमा अध्ययन गर्न नपाएका आफूहरु जस्ता छोरीलाई यस कार्यक्रम निकै प्रभावकारी रहेको उनी बताउँछिन् । 

उनीहरु मात्रै होइन, छोरी–बुहारी छात्रवृत्ति कार्यक्रमबाट प्रदेशका १० जिल्लाका पाँच सय २१ महिला लाभान्वित भएको प्रदेशको सामाजिक विकास मन्त्रालयअन्तर्गतको शिक्षा निर्देशनालयले जानकारी दिएको छ । निर्देशनालय र यस मातहतका सामाजिक विकास कार्यालयमार्फत यो कार्यक्रम कार्यान्वयन हुँदै आएको छ । कार्यक्रममार्फत कर्णाली प्रदेशमा अहिलेसम्म प्रवीणता प्रमाणपत्र सरह तीन वर्षे डिप्लोमाको विभिन्न विषयमा अध्ययनरत सञ्चालन गरिएको छ ।

निर्देशनालयका अनुसार नर्सिङ, स्वास्थ्य सहायक, फार्मेसी, ल्याब टेक्निसियन र रेडियोलोजिस्ट, बाली विज्ञान, बागबानी, पशु विज्ञान, वन विज्ञान, इन्जिनियरिङ र कम्प्युटर विज्ञानलगायतका प्राविधिक विषय अध्ययन गर्ने छोरी तथा बुहारीले छात्रवृत्ति पाउँदै आएका छन् । निर्देशनालयका निर्देशक दीपा हमालले अहिले छोरी–बुहारी छात्रवृत्तिको प्रभावकारिता बारेमा अध्ययन भइरहेको बताए । उनका अनुसार छनोट भएकालाई अध्ययन अवधिभर सरकारले एक पटकमा एक लाख दिने गरेको छ । 

छोरी–बुहारी छात्रवृत्तिअन्तर्गत प्राविधिक उच्च शिक्षा छात्रवृत्ति, उच्च शिक्षा जेहेन्दार छात्रवृत्ति, उच्च शिक्षा दलित छात्रवृत्ति, उच्च शिक्षा अपाङ्ग छात्रवृत्ति र कर्णाली प्रदेश घोषणाका लागि आन्दोलनमा शहीद भएका सन्ततिका लागि छात्रवृत्तिका कार्यक्रम ल्याएको निर्देशक हमालको भनाइ छ । उनी भन्छन्, `महिलालाई प्राविधिक शिक्षामा अब्बल बनाउँदै प्रदेशमा रहेको शिक्षामाथिको विभेद, महिला पुरुषबीचमा रहेको विभेद कम गर्ने मात्रै नभएर प्रदेशमा रहँदै आएको प्राविधिक शिक्षातर्फको जनशक्ति बढाउने हाम्रो उद्देश्य हो ।` 

यो कार्यक्रमको प्रभावकारिता धेरै रहेकाले प्रदेश सरकारले यसलाई यस वर्ष पनि निरन्तरता दिएको छ । प्राविधिकतर्फ विभिन्न विषयमा आवेदन माग गरी त्यसको आधारमा छात्रवृत्ति वितरण गर्ने गरिएको छ । कार्यविधिअनुसार छात्रवृत्ति रकम रु २४ हजारदेखि एक लाखसम्म दिने गरिएको छ । 
रासस