हेर्नुहोस् जेम्स वेब टेलिस्कोपले खिचेको बृहस्पति ग्रहको सुन्दर तस्बिर

काठमाडौंँ– विश्वको सबैभन्दा ठूलो र सबैभन्दा शक्तिशाली अन्तरिक्ष सम्बन्धी टेलिस्कोप जेम्स वेब टेलिस्कोप (जेडब्ल्यूएसटी)ले बृहस्पति ग्रहको अभूतपूर्व तस्बिर सार्वजनिक गरेको छ ।  उक्त टेलिस्कोपले जुलाई महिनामा सौर्य मण्डलको सबैभन्दा ठूलो ग्रह ‘बृहस्पति’को तस्बिरहरु खिचेको हो ।

 तस्बिरमा ग्रहको दुवै ध्रुवका उच्च भागमाथिका आकाशमा सूर्यका किरण देखिने रङ्गिन प्रकाश अर्थात् अरोराहरू, विशाल आँधीहरू, चन्द्रमाहरू र बृहस्पति वरपरको घेरा विस्तृत रूपमा देखिएको छ । 
उक्त तस्बिरहरूलाई खगोल शास्त्रीहरूले अद्भुत बताएका छन् ।  ग्रहहरूका विशेषताबारे अध्ययन गर्ने खगोलशास्त्री इम्के डे पाटेरले बृहस्पतिलाई यस्तो कहिल्यै नदेखेको र यो सबै निकै अद्भुत रहेको बताएकी छन् ।  युनिभर्सिटी अफ क्यालिफोर्नियाकी वैज्ञानिक पाटेरले उक्त कामका लागि मुख्य भूमिका निर्वाह गरेकी थिइन् । 
उनले थपिन्, ‘साँच्चै भन्नुपर्दा यो यति गज्जब होला भन्ने हामीले ठानेका थिएनौँ ।’ जेडब्ल्यूएसटी १० अर्ब अमेरिकी डलर खर्चेर अमेरिकी अन्तरिक्ष संस्था नासाको नेतृत्व विकास गरिएको अन्तर्राष्ट्रिय सहकार्यको काम हो ।   युरोपेली र क्यानाडेली अन्तरिक्ष निकायले समेत उक्त काममा साझेदारी भूमिका निर्वाह गरेका छन् ।