जग्गा धनी पुर्जा वितरण गर्न गुर्भाकोटमा नापनक्सा

सुर्खेत-  गुर्भाकोट नगरपालिकामा भूमिहीन, सुकुम्बासी र अव्यवस्थित बसोबास अन्तर्गतका जग्गाहरूको नापनक्साको काम सुरू गरेको छ ।

भूमिहीन तथा सुकुम्बासीलाई जग्गा धनी पुर्जा वितरणका लागि उक्त नापजाँच गर्ने काम सुरू गरिएको हो । गुर्भाकोट नगरपालिका वडा नम्बर ८ स्थित खटाङ्ग क्षेत्रबाट जग्गाहरूको नापनक्सा सुरू भएको नगरपालिकाले जनाएको छ ।

सोमबारदेखि जग्गाको नापजाँच गर्ने काम सुरू गरिएको गुर्भाकोट नगरपालिकाका प्रमुख हस्त पुनले बताए । ‘नगरपालिकाको वडा नम्वर आठबाट जग्गाको नापजाँच गर्ने काम सुरुवात गरेका छौं,’ पुनले भने, ‘अब अन्य सबै वडाहरूमा कार्यक्रम विस्तार गर्ने तयारी गरेका छौं ।’

नगरप्रमुख पुनले राष्ट्रिय भूमि आयोग सुर्खेत र गुर्भाकोट नगरपालिकाको समन्वयमा जग्गाको नापनक्सा सुरू भएकोमा खुसी व्यक्त गरे । पुनले सबैको साथ र सहयोग भएमा आगामी ६ महिनाभित्र गुर्भाकोट नगरभित्रका १४ वटै वडाका भूमिहीन तथा अव्यवस्थित बसोबासीलाई जग्गा धनी पुर्जा वितरण गरिने बताए । त्यसैगरी जग्गा धनी वितरणको लागि भूमि आयोग, मालपोत तथा नापीसँग समन्वय गरेर अघि बढेको उनले जिकिर गरे ।

नगर उपप्रमुख मैना बिकले पनि गुर्भाकोट नगरपालिकाले राष्ट्रिय भूमि आयोग सुर्खेतसँग समन्वय गरेर काम सुरू गर्न सफल भएको र अब थप नापी सम्बन्धीको कार्यमा सहयोग गर्न सबैलाई आग्रह गरिन् । उनले केही समयअघि कोटमाझ खर्कमा सेतो लालपुर्जा वितरण गरिसकेको बताइन् । उनले जग्गा धनी पुर्जा पाउन कुनै संवैधानिक तत्वले नरोक्ने जिकिर गरिन् । बिकले छिटोभन्दा छिटो जग्गा धनी पुर्जा वितरण  गर्न नगरपालिकाले पहल गर्ने जानकारी दिइन् ।

राष्ट्रिय भूमि आयोग जिल्ला समिति सुर्खेतका अध्यक्ष श्रीधर पौडेलले यसअघि चैत २५ मा साबिक कोटमाझ खर्कमा सेतो पुर्जा वितरण गरेको बताए । पौडेलले सरोकारवाला निकायसँग समन्वय गरेर काम अगाडि बढाउने उल्लेख गरे ।