विश्वकप क्रिकेटको ट्रफी सगरमाथा आधार शिविरदेखि जनकपुरसम्म लगिने

काठमाडौँ - अष्ट्रेलियामा अक्टोबर १६ देखि नोभेम्बर १३ सम्म आयोजना हुने आईसीसी टी-ट्वान्टी विश्वकप क्रिकेटको ट्रफी सगरमाथाको आधार शिविरमा पुर्‍याइने भएको छ ।

तालिका अनुसार अगस्ट ३० अर्थात भदौ १४ गते विश्वकपको ट्रफी नेपाल आइपुग्नेछ । ट्रफी नेपालमा भदौ १५ सम्म राखिने छ । सोही क्रममा ट्रफीलाई सर्वोच्च शिखर सगरमाथाको आधार शिविरमा पुर्‍याइने नेपाल क्रिकेट संघ (क्यान)ले जनाएको छ । 

क्यानका कार्यवाहक सचिव प्रशान्त विक्रम मल्लका अनुसार भदौ १५ गते ट्रफीलाई आधार शिविर पुर्‍याइनेछ । ट्रफीलाई भक्तपुर तथा जनकपुरधाममा प्रदर्शनीका लागि समेत राखिने योजना रहेको उनले बताए । 

नेपाल हुँदै ट्रफी सिंगापुर लगिने तालिका समेत रहेको छ । जुलाई ८ बाट सुरु भएको ट्रफी टुर अक्टुबर १६ मा अन्त्य हुनेछ । ट्रफीलाई विभिन्न २९ स्थानमा टुर गराइनेछ ।