ब्रमाण्डको सबै सत्य दिमागभित्र कैद छ भन्‍ने भ्रम छ प्रधानमन्त्रीलाई छ: शक्ति बस्‍नेत

काठमाडौं : नेकपा माओवादी केन्द्रका सांसद शक्ति बस्नेतले प्रधानमन्त्री केपी शर्मा ओलीमा ब्रमाण्डको सबै ज्ञान आफैमा रहेको भ्रम रहेको बताएका छन् । सोमबारको प्रतिनिधि सभा बैठकको विशेष समयमा बोल्दै उनले समस्या यहीबाट सुरु भएको बताए ।

‘उहाँ(प्रधानमन्त्री केपी शर्मा ओली) लाई एउटा भ्रम छ । यो ब्रमाण्डको सबै सत्य दिमागभित्र कैद छ भन्ने भ्रम छ प्रधानमन्त्रीलाई,’ उनले भने, ‘सत्यका स्रोतहरु धेरै छन् । बास्तविकता स्रोतहरू धेरै छन् । ब्रमाण्डको सत्य आफ्नै दिमागमा कैद छ भन्ने भ्रमबाट उहाँ जहिलेसम्म चलिरहनुहुन्छ मुलुकको नियति यस्तै भइरहन्छ ।’ 

उनले मुलुकको विकास जनअपेक्षाकृत रूपमा हुन नसकेको समेत बताए । ‘विकास निर्माण जनअपेक्षाअनुसार भइराखेका छैन,’ उनले भने, ‘सत्य यही हो । किन भइरहेको छैन ? यसको जिम्मेवार सरकार प्रमुख हुनुहुन्छ । उहाँ भ्रमको सिकार हुनु भएको छ । समस्या यहीँबाट सुरु भएको छ । सबै भइराखेको छैन ।’