भारतको हरिद्वारमा पूर्वराजाको रथयात्रा, हेलिकोप्टरबाट पुष्पवृष्टि

फोटो : एभिन्युज टेलिभिजन

काठमाडौँ : भारतको हरिद्वारमा सुरु भएको शाही स्नानको रथयात्रामा पूर्वराजा ज्ञानेन्द्र शाह पनि सहभागी भएका छन् । भारतको हरिद्वारमा गंगा नदीमा हुने शाही स्‍नान कार्यक्रमका लागि पूर्वराजा ज्ञानेन्द्र रथयात्रादेखि नै सहभागी भएका हुन् ।

पूर्वराजा ज्ञानेन्द्र तेस्रो रथमा छन् । त्यसअघिका रथमा हरिद्वार मन्दिरका पूजारी, मठाधीसलगायत छन् । हरिद्वारको मनकामना मन्दिरदेखि सुरु भएको रथयात्रा गंगा नदीको तटमा गएर समापन हुनेछ । रथयात्रापछि पूर्वराजा ज्ञानेन्द्रले गंगा नदीमा स्‍नान गर्ने कार्यक्रम छ । 

रथयात्राका लागि पूर्वराजा ज्ञानेन्द्रलाई निम्ता गरिएको थियो । निम्ता स्वीकार गरेर पूर्वराजा ज्ञानेन्द्र रथारोहरण कार्यक्रममा सहभागी भएका हुन् । पूर्वराजा ज्ञानेन्द्रसमेत रथारोहण कार्यक्रममा सहभागी भएपछि भारतको उत्तराखण्ड सरकारले हेलिकोप्टरबाट पुष्पवृटि गरेको छ । 

हरिद्वारमा हरेक वर्ष महाकुम्भ मेला लाग्‍ने गर्छ । पूर्वराजाको रथयात्रालाई महत्वसाथ हेरिएको छ । पूर्वराजा नेपालका विभिन्‍न मठमन्दिर र धार्मिक कार्यक्रममा सहभागी हुँदै आएका छन् । यसपटक हरिद्वारमा भइरहेको कुम्भमेलामा सहभागी भएपछि उनीप्रति थप चाँसो बढेको छ ।