नेपालमा पहिलो पटक नबिल फोनलोन-क्यू आर मर्चेन्टको सुरुवात

काठमाडौं–नबिल बैंकले नेपालमा पहिलोपटक आफ्ना क्यू आर मर्चेन्टलाई फोनलोनको सुविधाको सुरुवात गरेको छ । 
नबिल फोनलोन क्यूआर मर्चेन्ट सेवाको सुरुवात गरेसँगै क्यूआर मर्चेन्टले घरमा बसीबसी कुनै पनि धितो बिना नै नबिल स्मार्ट बैकिंङ मार्फत् तुरुन्तै कर्जा पाउन सक्ने बताइएको छ । 
नबिल बैंकले यूएनसिडिएफको सहकार्यमा साना तथा मझौला व्यवसाय गरिरहेका युवा तथा महिला उद्यमीहरुलाई लक्षित गरि यो सुविधा ल्याएको हो । 
सेवा अन्तर्गत कर्जा लिनचाहने व्यवसायीहरुले नबिलको क्यू आर मर्चेन्टमा एकल नाममा दर्ता हुनुपर्ने र नबिल स्मार्ट बैकिंङ लिनुपर्ने बताइएको छ । 
त्यसका साथसाथै अघिल्लो महिनामा पाँचवटा क्यूआर कारोबारबाट १० हजार बराबरको कारोबार गर्नुपर्ने छ ।  पछिल्लो चार हप्तामा हरेक हप्ता एउटा कारोबार हुनुपर्ने छ । 
बैंकका प्रमुख कार्यकारी अधिकृत ज्ञानेन्द्रप्रसाद ढुङ्गानाले भने, ‘यो पूर्ण रुपमा डिजिटल सेवा हो।’ 
ढुङ्गानाले भने, ‘हामीले कुनै धितो बिना नै क्यू आर कारोबारलाई आधार मानेर हाम्रा क्यू आर मर्चेन्टहरुलाई डिजिटल कारोबार गर्न प्रोत्साहन गर्न नेपालमा पहिलो पटक यो सुविधा ल्याएका हौं ।’
उनले यो सेवाले साना तथा मझौला व्यवसाय गरिरहेका युवा तथा महिला उद्यमीहरुलाई आफ्नो व्यवसाय बिस्तार गर्न मद्दत पुग्ने र डिजिटल बैकिङ प्रयोग गर्न प्रेरणा मिल्ने बताए ।