नर्भिकको सहयोगपछि बालकले पाए नयाँ जीवन

फाइल फोटो

काठमाडौंँ–उपचार खर्चको अभावमा गम्भीर अवस्थामा पुगेका एक बालकलाई नर्भिक अस्पतालले उद्धार गरी नयाँ जीवन दिएको छ ।  नर्भिक इन्टरनेशनल हस्पिटलले आफ्नो संस्थागत सामाजिक उत्तरदायित्व अन्तर्गत जनकपुरको लक्ष्मीनारायण गाउँपालिकास्थित सपहिका स्थायीबासी आठ वर्षीय बालक विजय महतोलाई उपचारमा सहुलियत प्रदान गरेको हो । 

अस्पतालले बालकलाई पूर्ण रुपमा निको बनाएर घर पठाएको जानकारी गराएको छ । आर्थिक अवस्था अत्यन्त कमजोर रहेको उक्त बालकको पेटको अगाडिको भागको मांसपेशीमा एक्कासी पिप जम्मा भएको कारण हिँड्नसक्ने अवस्थामा नभएको  र उपचार गरेर ठीक भएपछि घर फर्किनुअघि ठमठमी हिँड्नसक्ने भएको जानकारी अस्पतालले दिएको छ ।  

बुबा शिव शरण महतोका अनुसार जनकपुरको अस्पतालमा देखाउँदा त्यहाँका चिकित्सकले उपचार गर्न नसक्ने बताएपछि बालकलाई काठमाडौं ल्याइएको हो । 
आर्थिक अवस्था कमजोर रहेका कारण राम्रो अस्पताल लैजानसक्ने अवस्था आफ्नो नरहेको, तर आफू नर्भिकमा आएर कुरा गर्दा उपचारमा सहुलियतसँगै राम्रो उपचार सुविधा पाएको उनले बताए ।  ‘नर्भिकले उपचार खर्चमा समेत निकै छुट दिएर मजस्तो गरिबलाई गुण लगाएको छ ।’ महतोले भने, ‘उपचारमा संलग्न डा. अभय यादवले समेत हामीलाई छुट दिनुभयो । उहाँहरूकै सहयोगले आज मेरो छोरा ठीक भएको छ ।’ 

नर्भिकका प्रबन्ध निर्देशक मेघा चौधरीको निर्देशनमा बालकको उपचार व्यवस्था मिलाइएको थियो । डा. अभय यादव नेतृत्वको टिमले महतोको उपचार गरेको बताइएको छ ।  यादव नेतृत्वको टिममा सहभागी चिकित्सक डा. सुशील कायस्थले गम्भीर अवस्थाका बालकले उपचारपछि नयाँ जीवन पाएको बताएका छन् ।

इन्फेक्सनका कारण बालकको अवस्था निकै गम्भीर बनेको स्मरण गर्दै उनले भने, ‘बेलैमा उपचार नभएको भए अवस्था निकै गम्भीर बन्न सक्थ्यो । उपचारपछि अहिले उनको अवस्था निकै राम्रो भएको छ । तर ती बालकले एन्टिबायोटिक चाहिँ निकै लामो समयसम्म खानुपर्ने हुन्छ ।’ 

चौधरीले संस्थागत सामाजिक उत्तरदायित्व अन्तर्गत अस्पतालले वर्षेनी गरीब र निमुखा नागरिकहरुको उद्धार गरी निःशुल्क उपचार सेवा दिंदै आएको बताइन् । 
आगामी दिनमा पनि अस्पतालले खर्चकै अभावमा उपचार गर्न नसक्नेहरुलाई सहयोग गर्ने उनको प्रतिबद्धता रहेको छ ।