घट्न थाल्याे काेसीकाे बहाव, विस्थापितहरु आफन्तकाे आश्रयमा

बेलका-८ स्थित एउटा विद्यालयमा आश्रय लिइरहेका कोसी डुबान पीडितहरु । तस्बिर/इकागज

विराटनगर । सप्तकोसीले अस्थायी तटबन्ध भत्काएर गाउँ पसेपछि डुबानको जोखिमबाट बच्न गाउँ छाडेका अधिकांश विस्थापित परिवारहरु आफ्नै हिसाबले बसेका छन् । विस्थापितहरु धेरैले आफैंले बासको व्यवस्थापन गरेका छन्, केही आफन्त र चिनजान भएकाहरुमा आश्रय लिएर बसेका हुन् ।

करिब डेढ सय परिवारलाई मात्रै बेलका नगरपालिकाले बस्ने व्यवस्था मिलाएको जनाएको छ । बुधबार विहान ४ बजे सप्तकोसी नदीको बहाव बेलका नगरपालिका–८ डुम्रिबोटेबाट पश्चिमतर्फ लागेको थियो । वडा नम्बर ८ बाट वडा नंं ३, ९, २ र १ सम्मै अहिले कोसीको पानी पुगेको छ । सवैभन्दा तल्लो तटीय क्षेत्रमा डुबान भएको स्थानीय बताएका छन् । ​

आश्रयविहीन विस्थापित परिवारलाई वडा नम्बर ८ को आधारभूत विद्यालय चक्रपुर, वडा नम्बर ३ को आधारभूत विद्यालय सातपत्रे र कोसी जनता माविको भवनमा राखिएको बेलका नगरपालिकाकी उपमेयर जिरा राईले जानकारी दिइन् । उनले धेरैजसो परिवारहरु आफैं बासको व्यवस्थापन गरेर बसेको उनले बताइन् । बिहीबार बिहान सप्तकोसीले तटबन्ध भत्काएर बस्ती पसेको ठाउँको स्थलगत अनुगमन गर्दा पानी केही घटेको र बर्षात नरोकिएकोले जोखिम कायमै रहेको उपमेयर राईले बताइन् ।

‘अहिलेसम्मको अवस्था हेर्दा पानी केही घटेको छ, तर यस्तै पानी परे फेरि बढ्छ’ उनले भनिन्, ‘ प्रभावित क्षेत्रबाट आएका करिब अढाई सय परिवारलाई गरेर चार ठाउँमा राखेका छौं, धेरै त आफ्नै चिनजान र आफन्तकोमा गएर बस्नु भएको छ ।’ उनले केही विस्थापितहरु भने एउटा खाली रहेको गाइफार्ममा समेत बसिरहेको बताइन् ।

विस्थापित भएका मध्ये परिवारका महिला र बालबालिका रहेका छन् । पुरुषहरु भने पशुचौपायासहित घरैमा बसिरहेको जनाइएको छ । सप्तकोसी नदीमा पानीको सतह नघटेको खण्डमा हालको डुबानले दुई हजार ५०० परिवार विस्थापित हुने प्रारम्भिक अनुमान गरिएको थियो । जसमध्ये प्रभावित क्षेत्रका करिब एक हजार ५ सय परिवारका सदस्यहरुलाई उद्दार गरिएको स्थानीय प्रशासनको दाबी छ ।

केही भने पानी घटेको भन्दै बिहीबार बिहान सरसामान आफन्तकोमा राखेर घरतर्फ फर्किएका छन् । उद्दारमा खटिएको सशस्त्र प्रहरी, नेपाल प्रहरी र नेपाली सेनाको टोलीले उद्दार कार्य जारी राखेको जनाइएको छ । विस्थापित परिवारलाई खान नपाएरै मर्ने अवस्था आउन नदिने बुधबारको स्थलगत भ्रमणका क्रममा प्रदेश १ का आन्तरिक मामिला तथा कानुनमन्त्री केदार कार्कीले बताएका थिए ।

प्रभावित क्षेत्रका लागि पहिलो चरणमा ८ हजार किलो चामलसहित तेल, दाल र नुन राहत स्वरुप पठाइएको मन्त्री कार्कीले दाबी गरेका छन् । उदयपुरका प्रमुख जिल्ला अधिकारी वीरेन्द्रकुमार यादवले कोसीमा पानीको बहाव केही घटेको जानकारी दिएका छन् । उनले पानी घटेका कारण उद्दार र राहत वितरण समेत सहज बन्न सक्ने बताए ।