विधानविपरीत काम गर्नेलाई साथ दिनेहरू दास हुन्, हामी दास होइनौं: माधव नेपाल

फाइल तस्‍वीर

काठमाडौँ: नेकपा एमालेका वरिष्ठ नेता माधवकुमार नेपालले आफूहरू केपी ओलीको दास नभएको बताएका छन् । शुक्रबार विराटनगरमा नेता नेपालले विधानविपरीत काम गर्ने ओलीलाई साथ दिनेहरू दास भएको टिप्पणी गरे ।

‘हामी सबै पदाधिकारीको पद चैट हुने ओलीको बाँकी रहने ? यस्तो पनि कही हुन्छ ?’ उनले भने, ‘उहाँले पूरै अवैधानिक कदम चाल्नु भएको छ । विधान र विधिविपरीत काम गर्नु भएको छ । विधानविपरीत कामगर्ने कुरालाई पनि साथ दिने दास हुन् । हामी दास होइनौं । हामी ओलीको मुख हेरेर अगाडि बढेका होइनौं ।’

उनले ओलीमा असहिष्णुताको प्रवृति चरम पराकाष्ठमा पुगेको आरोप लगाए । ‘उहाँका भक्तजन, भजनमण्डली बाहेक अरु कसैलाई उहाँ सहन गर्नुहुन्न,’ उनले भने, ‘उहाँमा असहिष्णुताको प्रवृति चरम पराकाष्ठामा पुगेको छ । उहाँ एक्लिँदै जानु भएको छ ।’