इन्जिनियर डाँगीले आफूसँग भएको रकमको स्रोत खुलाउन नसक्दा...

काठमाडौं– मोटरबाटो निर्माण उपभोक्ता समितिसँग घूस लिएको अभियोगमा गंगादेव गाउँपालिका, रोल्पामा प्राविधिक शाखा प्रमुखको रुपमा कार्यरत इन्जिनियर नविन डाँगीविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा लगाएको छ ।

आयोगले बिहीबार डाँगीविरुद्ध ४ लाख ६ हजार ५ सय रुपैयाँ घूस लिएको अभियोगमा विशेष अदालतमा मुद्दा दर्ता गरेको हो । तर आयोगले डाँगीले सेवाग्राहीसँग ५० हजार रुपैयाँ घुस लिइसकेको अवस्थामा २०७९ असार २४ मा नियन्त्रणमा लिएको थियो । 

अनुसन्धानका अनुसन्धानको सिलसिलामा खानतलासी गर्दा इन्जिनियर डाँगीबाट ३ लाख ५६ हजार ५ सय रुपैयाँ बरामद गरेको थियो । घूस रकम ५० हजारसमेत गरी ४ लाख ६ हजार ५ सय विगो कायम गरी मुद्धा गरिएको हो ।

आयोगका अनुसार, बरामद रकमको श्रोत खुलाउने बस्तुनिष्ठ प्रमाण पेश गर्न नसकेकाले उक्त रकम डाँगीले सेवाग्राहीहरुबाट घुस÷रिसवतवापत लिएको देखिन्छ । उक्त रकम घूस भएको जिकीरसहित आयोगले जफतको माग दाबीसहित मुद्दा दर्ता गरेको हो ।

रोल्पाको गंगादेव गाउँपालिका मोटरबाटो निर्माण उपभोक्ता समितिले निर्माण गरेको मोटरबाटोको नापी किताव तयार गरी अन्तिम भुक्तानीको लागि फाइल पेश गरी दिने प्रयोजनार्थ सेवाग्राहीबाट घूस लिएको दाबी आयोगको छ ।