स्थानीय तह निर्वाचनको खर्च ५ अर्ब मात्रै

फाइल फोटो

काठमाडौँ- निर्वाचन आयोगले गत वैशाख ३० गते भएको स्थानीय तहको निर्वाचनमा ५ अर्ब ४ करोड ३ लाख ९२ हजार ८६७ रुपैयाँ खर्च भएको जनाएको छ । मंगलवार पत्रकार सम्मेलन गर्दै आयोगले खर्च विवरण सार्वजनिक गरेको हो । आयोगका प्रवक्ता शालिग्राम शर्मा पौडेलले स्थानीय तहको निर्वाचनमा भएको खर्च विवरण मंगलवार सार्वजनिक गरेका हुन् ।‍ खर्च मध्ये निर्वाचन आयोगको सचिवालयबाट मात्र १ अर्ब २ करोड ६३ लाख १२ हजार १२९ रुपैयाँ खर्च भएको छ। 

त्यस्तै मुख्य निर्वाचन अधिकृत तथा निर्वाचन अधिकृतको ७५३ वटा कार्यालय मार्फत ३ अर्ब ५४ करोड १२ लाख ७३ हजार ६१७ रुपैयाँ खर्च भएको पौडेलले जानकारी दिए। त्यसैगरी ७७ जिल्लाको निर्वाचन कार्यालयबाट ४१ करोड ३३ लाख ७ हजार १३० रुपैयाँ, गृह मन्त्रालय मार्फत मतपेटिका ढुवानीका लागि ४ करोड ५० लाख रुपैयाँ र सञ्चार कार्यका लागि १ करोड ४५ लाख रुपैयाँ खर्च भएको छ। 

नेपाल सरकारको अर्थ मन्त्रालयबाट आयोगलाई ८ अर्ब ११ करोड रुपैयाँ निकासा भएकोमा ५ अर्ब ४ करोड ३ लाख ९२ हजार ८६७ रुपैयाँ खर्च भएकोमा ३ अर्ब ६ लाख ९६ हजार १ सय २४ रुपैयाँ फिर्ता भएको पौडेलले जानकारी दिए।