बजेट प्रकरण : छानबिन समितको बैठक फरेन्सिक ल्याब विज्ञसहित अपराह्न फेरि बस्ने

फाइल तस्बिर

काठमाडौं - पूर्वअर्थमन्त्री जनार्दन शर्मामाथि छानबिन गर्न गठित विशेष संसदीय समितिको आज बिहान सिंहदरबारमा बसेको बैठक स्थगित भएको छ । समितिको बैठक बेलुकी चार बजे फेरि बस्ने गरी स्थगित भएको हो ।

‘केही विषय प्राविधिक भएकोले फरेनसिक ल्याब विज्ञहरूबाट जानकारी लिनु पर्ने हुँदा अहिलेलाई बैठक स्थगित भयो,’ बैठकबाट बाहिरिएपछि समितिका सदस्यसचिव सुरेन्द्र अर्यालले भने, ‘अपराह्न चार बजे बसेर उहाँहरूलाई आमन्त्रित गरेर प्रतिवेदनका विषयमा विशेष जानकारी लिन्छौँ ।’  

नेपाल प्रहरीको फरेन्सिक ल्यबाबाट प्रतिवेदनसहित समितिले पठाएको उपकरण, हार्डडिस्क हिजो फिर्ता भएको उनले जानकारी दिए । 

सोही प्रतिवेदनबारे छलफल गर्न आज बिहान समितिको बैठक राखिएको थियो । 

‘समितिले लाहछाप लगाएर पठाएको प्रतिवेदन खोल्यौं र हेर्‍यौँ । त्यसमा भएका विवरण अलि प्राविधिक विषय भएकोले विष्लेषण, अध्ययनकै क्रममा छ,’ अर्यालले भने । 

आज बेलुकी चार बजे बस्ने बैठकमा नेपाल प्रहरीको फरेनसिक ल्याबका विज्ञहरूलाई बोलाइएको र बैठकमा उनीहरूले प्राविधिक कुराहरू स्पष्ट पार्ने अर्यालले जनाए । 

केही दिनअघि समितिले अर्थ मन्त्रालयसको सीसी टिभी फुटेज रिकभर गर्नको लागि हार्डडिस्क प्रहरीको फरेनसिक ल्याबमा पठाएको थियो । 

‘बैठकमा उहाँहरूले प्राविधिक कुराहरू जानकारी गराउनुहुन्छ, त्यसपछि हामी निष्कर्षमा पुग्छौं,’ अर्याले भने । 

पूर्वअर्थमन्त्री शर्मामाथि बजेट बनाउने क्रममा अनधिकृत दुई जना व्यक्तिलाई मन्त्रालयमा प्रवेश गराई करको दर हेरफेर गरेको आरोप लागेको थियो । त्यसपछि उनले राजीनामा दिएका थिए भने प्रतिनिधि सभाले उनीमाथि छानबिन गन विशेष संसदीय छानबिन समिति गठन गरेको थियो ।