साफ खेल्न नेपाली यू-२० टिम भारत जाँदै

काठमाडौँ – साफ यू-२० च्याम्पयनसीपमा सहभागी हुने नेपाली टोलीको बिदाइ गरिएको छ । भारतमा हुने प्रतियोगिताका लागि टिमलाई शुक्रबार बिदाइ गरिएको हो । राष्ट्रिय खेलकुद परिषदका सदस्य सचिव टंक लाल घिसिङ, अखिल नेपाल फुटबल संघका अध्यक्ष पंकज विक्रम नेम्वाङ लगायतले नेपाली टोलीको बिदाइ गरेका हुन् । टोली शुक्रबार नै भारत प्रस्थान गर्ने छ । 

प्रतियोगितामा आयोजक भारत, नेपाल, माल्दिभ्स, श्रीलंका र बंगलादेशको सहभागिता रहने छ । नेपाली टोलीका मुख्य प्रशिक्षक मेघराज केसीले यसअघि नै २३ सदस्यीय टिम घोषणा गरेका थिए । नेपालको कप्तानी आयुष घलानले गर्ने छन् ।

प्रतियोगिता भुवनेश्वरस्थित कालिङ्गा स्टेडियममा जुलाई २५ देखि अगस्ट ५ सम्म आयोजना हुनेछ । 

नेपालले पहिलो खेल माल्दिभ्सविरुद्ध जुलाई २५ खेल्नेछ भने दोस्रो खेल श्रीलंकासँग जुलाई २७ मा खेल्नेछ । नेपालले तेस्रो खेल आयोजक भारतसँग जुलाई ३१ तथा अन्तिम खेल बंगलादेशविरुद्ध अगस्ट २ मा खेल्ने तालिका रहेको छ । राउन्डरोविनको खेलपछि शीर्ष दुई टोली फाइनलमा प्रवेश गर्नेछ । फाइनल अगस्ट ५ मा हुनेछ ।

नेपाली टोली :
गोलरक्षक :  ईश्वर गुरुङ, उनेश चौधरी, जियारथ शेख
डिफेन्डर : अमर श्रेष्ठ, सोनित दाहाल, आयुष श्रेष्ठ, अजय चौधरी, सुमित श्रेष्ठ, सृजन धानी, रोशन थापा, अभिषेक वाइबा
मिडफिल्डर : दिपेश गुरुङ, आशिष राई, सन्दीप कार्की, जन्मजय धामी, मोहित गुरुङ, कृतिश रत्न छिन्जु, सुगम सुवाल, मनग्य नकर्मी, आयुष घलान
फरवार्डः रोहित सुब्बा, निरञ्जन मल्ल, रोहन खड्गी