दुर्घटना न्यूनीकरण गर्न ‘टाइम कार्ड’

सुर्खेत- कर्णाली प्रदेशको राजधानी वीरेन्द्रनगर सुर्खेतदेखि दैलेख जोड्ने सडकमा टाइम कार्ड लागु गरिएको छ । उक्त सडक खण्डमा दुर्घटना बढ्न थालेपछि टाइम कार्ड लागु गरिएको हाे ।

सवारी दुर्घटना न्यूनीकरण गर्न टाइम कार्ड लागु गरिको जिल्ला प्रहरी कार्यालय दैलेखका डिएसपी भुवनेश्वर प्रसाद शाहले बताए । नारायण नगरपालिका-१ स्थित दैलेख-सुर्खेत सडक खण्डको अस्थायी बस बिसौनीमा एक कार्यक्रमबीच चालक र सहचालकहरूलाई टाइम कार्ड वितरण गरी कार्यान्वयनमा ल्याइएको हो ।

संविधान सभा सदस्य एवं कर्णाली प्रदेश सरकारका पूर्व मन्त्री अम्मरबहादुर थापा, नारायण नगरपालिका प्रमुख लोमन शर्मा र प्रमुख जिल्ला अधिकारी हरि प्याकुरेल लगायतको सहभागितामा टाइम कार्डको नियम शुभारम्भ गरिएको छ ।

जिल्लाका विभिन्‍न स्थानमा तीव्र गतिका कारण हुने सवारी दुर्घटनालाई न्यूनीकरण गर्ने उद्देश्यले टाइम कार्ड नियम लागु गरिएको डिएसपी शाहको भनाइ छ ।