हाइड्रोलिक लिकेज भएको न्यारोबडी उड्न थाल्यो

काठमाडौँ : हाइड्रोलिक लिकेज भएर बिग्रेको न्यारोबडी (कल साइन अल्फा किलो व्हिस्की- एकेडब्लू) ले भारतको नयाँ दिल्लीमा मर्मत गरेर ल्याएपछि आज मंगलबारदेखि उडान चालू गरेको छ । 

गत शनिबार नयाँ दिल्ली उडाएर लगिएको उक्त जहाज हिजो सोमबार ल्याइएको थयो । यसको नोज व्हिलमा हाइड्रोलिक लिकेज (टेक्निकल) देखिएको थियो । त्यसलाई मर्मत गर्ने पार्टपूजा निगमसँग नभएपछि दिल्ली लगिएको थियो । एकेडब्लू पनि बिग्रिएर थन्केपछि निगमको ७५ प्रतिशत उडान प्रभावित भएको थियो । 

निगम स्रोतका अनुसार बिग्रेको न्यारो बडी बनाएर ल्याएपछि दिल्ली र दुबईको मात्र नियमित उडान भइरहेको छ । मलेसिया, दोहा र हङकङका नियमित उडान भने प्रभावित भएका छन् ।

दिल्ली र दुबईमा क्वारेन्टाइन नभएकाले जाने र आउने दुवै प्रकारका यात्रुको संख्या उल्लेखनीय छ । चारवटै जहाज हुँदा दोहा पनि दैनिक थियो । ‘दुईवटा जहाज भएपछि उडान ५० प्रतिशत मात्र छ,’ स्रोतले भन्यो । 

एकेडब्लू जहाजको त्रिभुवन अन्तर्राष्ट्रिय विमानस्थलमा आइसकेपछि चेक जाँच गर्दा नोज व्हिलमा हाइड्रोलिक लिकेज (टेक्निकल) देखियो । निगमको अर्को न्यारो बडी (अल्फा किलो एक्सरे- एकेएक्स) नियमित मर्मत सम्भार (सी चेक) का लागि गत शुक्रबार सिंगापुर गयो । यसको मर्मतका लागि करिब दुई साता लाग्ने अनुमान छ ।
 
त्यसैगरी गत महिनादेखि हार्डल्याण्डिङका कारण ग्राउन्डेड (थन्केको) भएको वाइडबडी (अल्फा लिमा जुलु- एएलजेड) को अझै मर्मत भएको छैन । मर्मतका लागि निगमले प्रक्रिया थालेको छ । अर्काे वाइडबडी (अल्फा लिमा यांङ्की- एएलवाई) र एकेडब्लूले ५० प्रतिशत मात्र अन्तर्राष्ट्रिय उडान भरिरहेको छ ।