अष्ट्रेलियाविरुद्ध श्रीलंकाको शानदार जित

काठमाडौँ – श्रीलंका र पाहुना टोली अष्ट्रेलियाबीचको दुई खेलको टेष्ट सिरिज १-१ को बराबरीमा टुंगिएको छ । दोस्रो टेष्ट श्रीलंकाले एक इनिङ र ३९ रनले जितेपछि सिरिज बराबरीमा टुंगिएको हो ।

टस जितेर पहिले ब्याटिङ गरेको अष्ट्रेलियाले पहिलो इनिङ्समा ३ सय ६४ रन जोड्दा श्रीलंकाले ५ सय ५४ रन बनाएपछि पाहुना टोली १ सय ९० रनले पछि परेको थियो । तर दोस्रो इनिङ्समा भने अष्ट्रेलिया १ सय ५१ रनमै समेटिएपछि खेल श्रीलंकाले एक इनिङ र ३९ रनले जित्यो ।

दोस्रो इनिङ्समा अष्ट्रेलियाका लागि मार्नस लाबुचानेले सर्वाधिक ३२ रन जोडे । श्रीलंकाका प्रभात जयसुर्याले सर्वाधिक ६ विकेट हात पारे ।

यसअघि पहिलो इनिङ्समा अष्ट्रेलियाका लागि स्टेभेन स्मिथले १ सय ४५ रन तथा मार्नस लाबुचानले १ सय ४ रन जोडेका थिए । श्रीलंकाका प्रभात जयसुर्याले पहिलो इनिङ्समा पनि ६ विकेट लिएका थिए ।

श्रीलंकाका लागि भने पहिलो इनिङ्समा दिनेश चन्डिमलले अविजित २ सय ६ रन बनाएका थिए । कप्तान दिमुथ करुनारत्नेले ८६ तथा कुशल मेन्डिसले ८५ रन बनाएका थिए ।

अष्ट्रेलियाका लागि मिचेल स्टार्कले सर्वाधिक ४ तथा मिचेल स्विपसनले ३ विकेट झारे ।

पहिलो टेष्ट अष्ट्रेलियाले १० विकेटले जितेको थियो ।