माओवादीले फिर्ता लियो मुख्यमन्त्री राईविरुद्धको अविश्‍वास प्रस्ताव

काठमाडौँ  :  नेकपा माओवादी केन्द्रले प्रदेश १ का मुख्यमात्री शेरधन राईविरुद्ध दर्ता गरेको अविश्वासको प्रस्ताव फिर्ता लिएको छ ।  सोमबार बसेको प्रदेश सभा बैठकमा संसदीय दलका नेता ईन्द्रबहादुर आङ्बोले सरकारविरुद्ध दर्ता गरेको अविश्वास प्रस्ताव फिर्ता लिएको घोषणा गरे ।  

गत पुस १२ गते तत्कालीन नेकपाको दाहाल-नेपाल समूहले मुख्यमन्त्री राईविरुद्ध अविश्वासको प्रस्ताव दर्ता गरेको थियो । मुख्यमन्त्री राईकै निर्देशनमा एमालेकै माधव नेपाल समूहले गत १७ गते अविश्वासको प्रस्तावमा गरेको हस्ताक्षर फिर्ता गरेको थियो ।  फागुन २३ मा सर्वाेच्च अदालतले नेकपा एमाले र माओवादी केन्द्र मिलेर बनेको नेकपा खारेज गरेसँगै अविश्वासको प्रस्ताव फेल हुने भएपछि माओवादीले फिर्ता लिने निर्णय गरेको हो ।   

विशेष परिस्थितिमा दर्ता भएको प्रस्ताव फिर्ता गरिएको उनको भनाइ छ ।  ‘सरकारविरुद्धको प्रस्ताव फिर्ता भए पनि सरकारप्रतिको अविश्वास भने कायमै छ,’ उनले भने ।  त्यस्तै संसद्‍मा एमालेकै माधवकुमार नेपाल समूहका राजेन्द्र राईले पनि अविश्वासको प्रस्ताव फिर्ता लिएको घोषणा गरेका थिए ।