मेसिन रोलर भएको कामलाई ज्यामीबाट गराएको देखाएपछि भ्रष्टाचार अभियोग

काठमाडाैँ– पोखरीमा पार्क निर्माण गर्दा उपभोक्ता समितिसँग मिली मेसिनबाट भएको कामलाई ज्यामी गराएको भनी भुक्तानी दिने÷लिने दुवैविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा लगाएको छ । 

विराटनगर महानगरपालिका–१५ मा पार्क निर्माण र भुक्तानीमा संलग्न तत्कालीन नगरउपप्रमुख इन्दीरा कार्की, वडाध्यक्ष, प्रशासकीय अधिकृत, इन्जिनियर, उपभोक्ता समितिका पदाधिकारीविरुद्ध भ्रष्टाचार मुद्दा लगाएको हो । आयोगले उपप्रमुख कार्की र तत्कालीन १५ नम्बर वडा अध्यक्ष असलम आलमविरुद्ध ५ लाख ८ हजार ६ सय ६९ रुपैयाँ भ्रष्टाचार गरेको अभियोग लगाएको हो । 

विराटनगर महानगरपालिका–१५ का पोखरी निर्माणमा माटो फिलिङ गर्ने क्रममा रोलर मेसिनबाट भएको कामलाई ज्यामीद्वारा गरिएको मूल्यांकनमा भुक्तानी दिएको अभियोग लगाएको छ । नगरउपप्रमुख कार्की र तत्कालीन वडाध्यक्ष असलम आलमले गलत मूल्याङ्कनको आधारमा पोखरीमा पार्क निर्माण कार्यको मूल्याङ्कन जाँचपास तथा फरफारखको लागि योजना अनुगमन समितिको बैठक बसी निर्णय गराएका थिए । आयोगले उक्त कार्यमा भ्रष्टाचार भएको ठहर्याउँदै कैद र बिगो बमोजिम जरिवाना असुलीको मागसहित भ्रष्टाचार मुद्दा चलाएको हो ।

त्यसअतिरिक्त पोखरीमा पार्क निर्माण उपभोक्ता समितिका अध्यक्ष बलदेव शाहु सुडी, सचिव दिनानाथ आचार्य र कोषाध्यक्ष कल्पना घिमिरेविरुद्ध वास्तविकभन्दा बढी गरेको देखाएको र महानगरपालिकासँग गरेको सम्झौता विपरीत रोलर मेसिनको प्रयोग गरी माटो फिलिङ्गको कार्य सम्पन्न गरेको अभियोग आयोगले लगाएको छ । 

उनीहरुले ज्यामीद्वारा काम गराउने गरी तयार भएको लागत अनुमानका आधारमा भुक्तानी लिएका थिए । मेसिनले गरेको कामलाई ज्यामीद्वारा गरेको भनी गैरकानूनी लाभ प्राप्त गर्ने बदनियतले झुट्टा डोर हाजिर, झुट्टा नापी किताब र कार्य सम्पन्न प्रतिवेदन तयार गरी उक्त कागजातहरू नगर कार्यपालिकाको कार्यालयमा पेस गरी भुक्तानी लिएका थिए । उनीहरुविरुद्ध १० लाख ५५ हजार ९ सय ७९ रुपैयाँ भ्रष्टाचार अभियोग लगाएको हो ।

त्यसअतिरिक्त विराटनगर महानगरपालिकाका तत्कालीन प्रमुख प्रशासकीय अधिकृत एकदेव अधिकारी, सहरी विकास महाशाखा प्रमुख इन्जिनियर गोपाल पोखरेल, इन्जिनियर पुष्पक प्रधान र सव–इन्जिनियर मो. इफतेखार आलमविरुद्ध ‘नापी किताबमा बढाई चढाई गरी मेसिनको कामलाई ज्यामीबाट भएको भनी भुक्तानी दिएको’ अभियोग अख्तियारले लगाएको छ । उनीहरु १० लाख ५५ हजार ९ सय ७९ रुपैयाँ भ्रष्टाचार अभियोग लगाउँदै कैद र बिगो बमोजिम जरिवानाको माग दावी लिएको छ ।