ओलीले बैठक नबोलाए दाहाल पक्षले के गर्ला ?

काठमाडौं : प्रधानमन्त्री तथा नेकपा अध्यक्ष केपी ओलीले सचिवालय बैठक नबोलाए के गर्ने भन्नेमा पुष्पकमल दाहाल पक्षधर अलमलमा परेका छन् । सत्तारुढ नेकपाभित्रको विवादले उग्र रुप लिएपछि दाहाल पक्षधर पाँच सचिवालय सदस्य माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठले दुई दिनअघि प्रधानमन्त्रीसँग भेटेर तत्काल सचिवालय बैठक बोलाउन आग्रह गरेका थिए । 

उनीहरुले शुक्रबार पार्टी कार्यालयमा ओलीको कार्यशैलीविरुद्ध लिखित आग्रह गरेका थिए । उक्त बैठकमा गृहमन्त्रीसमेत रहेका रामबहादुर थापा उपस्थित नभए पनि बहुमत सचिवालय सदस्य दाहाल पक्षमा रहेका थिए । दाहालसँग बहुमत रहेपछि प्रधानमन्त्री ओलीले आइतबार नेपाल र उनी निकट डा. भीम रावल, सुरेन्द्र पाण्डे र रघुजी पन्तलाई बालुवाटार बोलाएर वार्ता गरेका थिए । 

प्रधानमन्त्रीले अझै बैठक नबोलाएकाले दाहाल पक्षधर के गर्ने भन्ने रणनीति तय गर्दैछन् । प्रधानमन्त्रीलाई दुई दिने अल्टिमेटम दिएकाले साँझसम्म पर्खने उनीहरुले बताए । नेकपा प्रवक्ता नारायणकाजी श्रेष्ठले भने, ‘केहीबेर पर्खने र छलफल गर्नेछौं । त्यसपछि के गर्ने निर्णय गर्नेछौं ।’

श्रेष्ठले प्रधानमन्त्रीले बैठक बोलाउनेमा आफूहरु आशावादी रहेको पनि बताए । ‘नबोलाए अर्को रणनीतिमा हामी अघि बढ्ने छौं,’ श्रेष्ठले इकागजसँग भने, ‘दलभित्रको समस्या समाधान गर्दै जानुपर्ने अवस्था छ ।’

नेकपा केन्दीय कमिटीको बैठक यही कात्तिक १५ गते बस्ने तय भएको थियो । तर नेताहरुबीच बढ्दो विवादका कारण केन्द्रीय कमिटी बैठक एक महिना पर धकेलिएको छ । यसको असर आगामी चैतमा गर्ने भनिएको नेकपाको एकता अधिवेशनसम्म पर्ने देखिन्छ ।