एमालेले अर्थमन्त्रीलाई बोल्न नदिने अडान राखेपछि प्रतिनिधि सभा बैठक दिउँसो २ बजेसम्मलाई स्थगित

फाइल तस्बिर

काठमाडौँ - अर्थमन्त्री फुटेज प्रकरणका कारण प्रतिनिधि सभा बैठक दुई बजेका लागि सरेको छ । ११ बस्ने भनिएको बैठक दुई बजे मात्रै बस्ने भएको हो । संसद् सचिवालय स्रोतका अनुसार अर्थमन्त्री जनार्दन शर्मालाई विपक्षीले बोल्न नदिने भएपछि बैठक बस्दै नबसी दुई बजेसम्मलाई स्थगित भएको हो । 

अर्थमन्त्रीले बोल्ने विषयमा आज संसद् सचिवालयमा केही मन्त्री र दलका सचेतकबीच अनौपचारिक छलफल भएको थियो । छलफलमा एमालेले पहिले अर्थमन्त्रालयको सीसीटीभी फुटेज हेर्न पाउनुपर्ने अडान लिएको थियो । 

'अर्थमन्त्रीलाई संसद्‍मा बोल्न दिने विषयमा छलफल भयो,' संसद् सचिवालय स्रोतले इकागजसँग भन्यो, 'प्रमुख प्रतिपक्षी एमालेले पहिले फुटेज हेर्न पाउनुपर्ने माग राखेपछि अर्थमन्त्रीले संसद्‍मा बोल्ने विषयमा सहमति हुन सकेन । अर्थमन्त्रीले बोल्ने विषयमा सहमति हुन नसकेपछि बैठक सारिएको हो । अब प्रतिनिधि सभा बैठक दिउँसो दुई बजे बस्ने तय भएको छ ।'

बजेट निर्माणको क्रममा अर्थ मन्त्रालयमा अनधिकृत मान्छेलाई प्रवेश दिएर करका दर हेरफेर गरेको आरोप शर्मामाथि लागेको छ । अर्थ मन्त्रालयले सो दिनको सीसीटीभी फुटैजसमेत डिलिट भएको जवाफ दिएपपछि विषय थप पेचिलो बनेको छ । प्रमुख प्रतिपक्षी एमालेले अर्थमन्त्रीले राजीनामा दिनुपर्ने र छानबिनका लागि संसदीय समिति बन्नुपर्ने माग राख्दै आएको छ । अर्थमन्त्रीमाथि छानबिन गर्न कांग्रेसभित्र पनि आवाज उठेको छ ।