रौनकको प्रेममा सुपुष्पा

काठमाडौं : वर्षा सिवाकोटीपछि अर्की हिरोइन पनि प्रेममा परेको खबर छ । यी हिरोइन हुन्, सुपुष्पा भट्ट । ‘रणवीर’ फिल्मबाट रजतपटमा डेब्यू गरेकी सुपुष्पा ‘कबड्डी कबड्डी’ निर्माता रौनकबिक्रम कँडेलको प्रेममा परेकी हुन् । 

दुवै निटक स्रोतले दिएको जानकारी अनुसार सुपष्पा र रौनकले ६ महिनायता एकअर्कालाई डेट गर्दै आइरहेका छन् । इन्जिनियरिङकी विद्यार्थी सुपुष्पाले ‘रणवीर’बाट डेब्यू गरेयता ‘छ माया छपक्कै’ र ‘चपली हाइट ३’ मा अभिनय गरेकी थिइन् । जसमध्ये ‘छ माया छपक्कै’ प्रदर्शन भइसकेको छ भने ‘चपली हाइट ३’ प्रदर्शनको पालो कुरेर बसिरहेको छ ।

गतसाल यही समयमा प्रदर्शन हुन ठिक्क परेको फिल्म महामारीका कारण रोकिएको थियो । निर्माता अर्जुनकुमारले अब यो फिल्म दसैँको केही दिनअघि प्रदर्शन गर्ने बताएका थिए । 

रौनकले भने अब ‘ब्रम्हजंग’को भिडियो बनाउने चर्चा छ । ‘कर्णाली ब्लुज’ का लेखक बुद्धिसागरले लेखेको यो फिल्म महंगो भएका कारण बन्न नसकेको चर्चा थियो । यो फिल्मलाई अर्जुनकुमार र रामबाबु गुरुङ मिलेर बनाउन लागेका थिए । 

रौनकको नाम यसअघि भने बेनिशा हमालसँग जोडिने गरेको थियो । रौनक र बेनिशालाई थुप्रै पटक रात्रिक्लबका क्यामराले कैद पनि गरेका थिए । तर, सार्वजनिक रुपमा भने दुवैले आफ्नो सम्बन्ध सकारेका थिएनन् ।