प्रदेश १ एमाले संसदीय दलको उपनेतामा अधिकारी र सचेतकमा कार्की

विराटनगर । प्रदेश १ को प्रमुख प्रतिपक्षी दल नेकपा एमालेले संसदीय दलको रिक्त पदाधिकारीलाई पूर्णता दिएको छ । दलको उपनेतामा प्रदेशसभा सदस्य यशाेदा अधिकारी र सचेतकमा विमल कार्कीलाई चयन गरेको एमाले संसदीय दलका नेता भीम प्रसाद आचार्यले हस्ताक्षर गरेको पत्रमा उल्लेख छ ।

प्रदेशसभाको सवैभन्दा ठुलो दल भएपनि एमालेले दलको रिक्त रहेका पदाधिकारीहरु टुंग्याउन सकेको थिएन । लामो छलफलपछि उपनेतामा अधिकारी र सचेतकमा कार्की नियुक्त भएका हुन् । नेकपा विभाजन ताका माधव कुमार नेपाल समूहसँग रहेकी प्रदेशसभा सदस्य अधिकारी पछि एमालेमै रहेकी थिइन् ।

दलको उपनेता चयन भएकी अधिकारी एमालेबाट मोरङ जिल्लाको प्रतिनिधित्व गर्ने समानुपातिक सांसद हुन् । सचेतक चयन भएका कार्की भने उदयपुरको क्षेत्र नम्बर १ को प्रदेशसभा क्षेत्र १ बाट निर्वाचित सांसद हुन् । उपनेतामा अधिकारी र सचेतकमा कार्कीलाई नियुक्त गरिएको पत्र एमाले संसदीय दलले सभामुख प्रदीपकुमार भण्डारीसमक्ष जानकारी गराएको छ ।