म्यानमारको सैनिक दमनविरुद्ध काठमाडौँमा प्रदर्शन

काठमाडौँ : म्यानमारमा भएको सैनिक दमनको विरुद्धमा ललितपुरको पुल्चोकस्थित संयुक्त राष्ट्रसंघको भवन अगाडि प्रदर्शन भएको छ । प्रजातान्त्रिक विचार समाज नेपाल, मानव अधिकार सङ्गठन र न्यायका लागि मानवअधिकार सञ्‍जालले म्यानमारमा नागरिकमाथि भएको सैनिक दमनको काठमाडौँमा विरोध प्रदर्शन गरेका हुन् ।

म्यानमारमा भएको नरसंहारको विरुद्धमा उत्रिएका मानवअधिकारकर्मीहरुले भारत र चीनले समेत दमनको मौन समर्थन दिएको भन्दै शुक्रबार विहान पुल्चोकमा रहेको संयुक्त राष्ट्रसंघको कार्यालय अगाडि पुगेर विरोध जनाएका हुन् । उस क्षेत्रका मुलुकहरूले  बिम्स्टेक  मन्त्री स्तरीय बैठक गरेर सैनिक शासकलाई स्वागत तथा समर्थन गरेको हो ।

प्राजातान्त्रिक विचार समाज नेपालका वरिष्ठ उपाध्यक्ष कुलचन्द्र वाग्लेले म्यानमारमा भएको नरसंहारको विरुद्धमा छिमेकी राष्ट्रहरु नै चुप लागेर बसेको भन्दै आपत्ति जनाए । नेपालले पनि यसमा नबोलेको विषयमा पनि उनीहरूले आक्राेस व्यक्त गरेका थिए  ।

मानवअधिकारकर्मीहरुले ‘म्यानमारमा सैनिक दमन बन्द गर’, ‘म्यानमारमा मानवअधिकार उलंघन बन्द गर’, ‘म्यानमारमा सैन्य शासनद्वारा गरिएको नरसंहारको घोर भत्र्सना गर्दछौं’, ‘म्यानमारमा प्रजातन्त्र र नागरिक शासन बहाली गर’, ‘शासकलाई अन्तर्राष्ट्रिय अदालतमा हाजिर गर’ लगायतका नारा लेखिएका व्यानर र प्लेकार्ड बोकेर प्रदर्शन गरेका थिए ।