जबरजस्ती करणीको हदम्याद र गाँजा खेती विधेयकबारे आयोगले अध्ययन गर्दै

काठमाडौँ- संसदमा केही साताअघि छलफल भएको जबरजस्ती करणीको मुद्धामा हदम्यादको प्रावधान र संसद्‌मा विचाराधीन रहेको गाँजा खेती विधेयकबारे कानुन आयोगले अध्ययन गरिरहेको छ । 

बुधबारको प्रतिनिधि सभाको बैठकमा सांसदहरुले सोधेका प्रश्नहरुको जवाफ दिँदै कानुन तथा न्याय मन्त्री गोविन्द प्रसाद शर्माले यी दुवै विषयमा अध्ययन गरेर प्रतिवेदन बुझाउन आफ्नो मन्त्रालयले कानुन आयोगलाई अह्राएको बताए ।

उनले आयोगले छिट्टै यी विषयमा यथेष्ट अध्ययन गरेर प्रतिवेदन बुझाउने तयारी गरिरहेको बताए । ‘संसद्‌मा विचाराधीन गाँजा खेतीसम्बन्धी विधेयक र जबरजस्ती करणीसम्बन्धी मुद्धामा हदम्यादको प्रावधान हटाउने वा नहटाउने भन्ने विषयमा अहिले कानुन आयोगले अध्ययन गर्न हामीले अह्राएका छौँ । अन्य मुलुकमा यी कुरामा के प्रचलन छ, नेपालमा कसरी गर्न सकिन्छ कि सकिँदैन भन्ने सन्दर्भमा हामीले अध्ययन गर्न लगाएका छौँ,’ उनले भने, कानुन आयोगले छिट्टै प्रतिवेदन बुझाउँछ ।’