अनाधिकृत व्यक्तिले बजेट बनायो भन्ने कुरा भ्रामक हो : अर्थमन्त्री शर्मा

काठमाडौं–अर्थमन्त्री जनार्दन शर्माले बजेट निर्माणमा अनाधिकृत व्यक्तिको प्रवेश भई चलखेल भएको भन्ने कुरा भ्रामक भएको बताएका छन् । संसद्माको मंगलबारको बैठकमा थुप्रै सांसदले बजेट निर्माण प्रक्रियामाथि प्रश्न उठाएका थिए । सांसदहरूको प्रश्नको उत्तर दिँदै उनले बाहिर आएका समाचार कपोलकल्पित भएको बताएका हुन् । 

‘अहिले एउटा विषय उठेको छ,’ अर्थमन्त्री शर्माले भने, ‘बजेट निर्माण गर्दा राजश्वको दरहरू घटबढ गर्न कुनै मान्छे आएर रातको १२ चलखेल गर्यो‍ भन्ने सन्दर्भमा जुन विषय उठेको छ । यो अत्यन्त भ्रामक र कपोलकल्पित एउटा झुठ्ठा कथा बनाइएको छ । यसको म खण्डन गर्न चाहन्छु ।’ 

उनले बजेट सचिवहरूको नेतृत्वको कमिटीमार्फत  आधिकारिक ढंगले तयार भएको दाबी गरे । ‘मन्त्रालयका जिम्मेवार पदाधिकारीहरू सचिव ज्यूहरूको नेतृत्वमा राजश्व सचिवको नेतृत्वमा राजश्व सम्बन्धि तयारी र अर्थसचिवको नेतृत्वमा अर्थ र राजश्व दुवै तयारी हुने गरि कार्यविभाजन हुने र कमिटीहरू बन्ने हो,’ उनले भने, ‘र ती कमिटीहरूले बजेटका विषयलाई प्रक्रियागत रुपमा टुंग्याउने भएको हुनाले ती कुराहरू त्यसरी नै सम्पन्न भएको कुरा म स्पष्ट गर्न चाहान्छु ।’

मन्त्री शर्माले सबै काम आधिकारिक ढंगले भएको र नियमावली प्रति उत्तरदायी भएर बनाएको समेत बताए । ‘सबै कामहरू आधिकारिक ढंगले भएका र अर्थमन्त्रीको हैसियतले नियमावलीप्रति उत्तरदायी भएर बजेट बनाइएको कुरा स्पष्ट गर्न चाहान्छु,’ उनले भने, ‘अनाधिकृत व्यक्तिले बजेट बनायो भन्ने कुरा भ्रामक भएको कुरा जानकारी गराउन चाहान्छु ।’