परिवारबाट मुक्ति चाहियो भन्दै र्‍यापर जी–बबकोे पत्रकार सम्मेलन

काठमाडौँ -  आफ्नै बुबाआमाविरुद्ध मुद्दा हालेका र्‍यापर जी–बब (सुदीप भण्डारी)ले आफू परिवारसँग सन्तुष्ट नरहेको बताएका छन् । उनले आइतबार कालोपुलस्थित एक ब्याङक्वेटमा पत्रकार सम्मेलन गर्दै उनले आफ्ना दुइटा माग रहेका बताएका छन् । जी–बबले आफूले काम गरेको पैसा आफूले पाउनुपर्ने र आफ्नो जीवनमा परिवारले कुनै हस्तक्षेप गर्न नहुने आफ्नो माग रहेको बताएका थिए ।

‘मेरो धेरै केही कुरा छैन । मलाई परिवारको भर छैन,त्यसैले म आफ्नो जीवन आफ्नो हिसाबले बिताउन चाहान्छु । आर्थिकदेखि बाँकी कुराको निर्णय गर्न म आफैँ सक्षम छु, परिवारले अनाश्यवक दुःख दिनु भएन,’उनले पत्रकार सम्मेलनमा भने । 

परिवारले जी–बबको कमाइमा भाग खोजेपछि जी–बबसँग सम्झौता गरेको एनटीएफ र परिवारको झगडा परेको हो । आफ्नै छोरालाई अपहरण गरेको  भन्दै जी–बबका बुबाआमा एनटीएफविरुद्ध जिल्ला प्रशासन कार्यालय गएपछि विवादले चर्को रुपमा लिएको हो । जी–बबसँग आफूहरूको दुई वर्षको सम्झौता रहेको र त्यतिन्जेलसम्म जी–बबलाई एनटीएफसँग काम गर्न परिवारले अवरोध नगर्नेबाहेक आफूहरूको कुनै माग नरहेका एनटीएफका निमसाङ शेर्पाले बताएका छन् ।

‘जी–बब जहाँ बसे पनि बसोस् हाम्रो चासोको कुरा हैन । ऊसँग हाम्रो दुई वर्षको सम्झौता छ जसमा एउटा एल्बम निकाल्नेदेखि विभिन्न कार्यक्रम गर्ने कुरा छन् । हामीले खोजेको समयमा ऊ उपलब्ध भइदिए भयो,’ शेर्पाले इकागजसँग भने, ‘तर परिवारले हामीले नै जी–बबलाई बन्धक बनाएको भन्दै प्रहरी उजुरी गर्न गयौ । हामीले बाध्य भएर मुख खोल्नु परेको हो ।’ 

 शेर्पाका अनुसार आफूहरूको सम्झौता जी–बबसँगै रहेकाले आफूहरूले पेमेन्ट पनि उसैलाई गर्ने तर परिवारले यसमा भाग खोजेकाले समस्या आएको शेर्पाले बताए । शेर्पाले भने, ‘उसले रिहाब जानुपरे म आफ्नो हिसाबले जान्छु भनेको छ । तर परिवारले जी–बबको कुरा नमान्दा बेकारमा विवाद भयो ।’

शेर्पाले जी–बब अझै पनि पूर्णतया स्वस्थय नभएकाले आफूहरूले कार्यक्रमको सम्झौता गर्ने तर जी–बब नआइदिने हो भने मार्सेलाको कार्यक्रममा झैँ तोडफोड हुनसक्छ । यस्तो नहोस् भन्नका लागि नै जी–बबलाई आफूहरूले साथै लिएर बस्न चाहेको बताएका छन् । तर परिवारले भने पैसाको लोभमा निहुँ खोजेको शेर्पाको आरोप छ । 

‘उहाँको छोरा हो । फकाएर लिएर गए भइहाल्यो । हामीलाई सम्झौताअनुसार काम गर्न त दिन पर्यौ नी’ शेर्पाले भने । उता जी–बबले भने परिवारले एनटीएफ र आफूविरुद्ध मुद्दा हाले पछि बुबा आमाले आफ्नो मायाले भन्दा पनि पैसाको लोभमा माया गरिटोपलेको आरोप लगाएका छन् । उनले आमाले आफ्नो साथीको रिहाबमा जबर्जस्ती राख्न नपाएर अनके थरि गरेको पनि आरोप लगाएका छन् । ‘मैले अरु कुरामा हैन, म खुट्टा हालिसकेको ठूलो छोरा हो, मलाई छाडिदिनु पर्यो भनेर निवेदन हालेको हो । मलाई स्वतन्त्रता चाहियो भन्दै मैले निवेदन देको हो,’उनको भनाइ थियो । उनले आइतबारदेखि नै आफूले परिवार त्यागेको र नयाँ परिवार बनाउन लागिपरेको बताएका थिए । 

जी–बबले आफू यो संसारकै सर्वोत्कृष्ट ब्याटल र्यापर रहेको पनि दाबी गरेका थिए । उनले आफूलाई केही समय दिए संसारकै उत्कृष्ट र्याप दिने वाचा पनि गरेका थिए । जी–बबले आफूले आमासँग सम्पर्क नगरेकाले आमाले अपहरण गरेर मिडियामा गएको पनि आरोप लगाएका थिए ।