होटल बाहिर युवा मृत फेला

भैरहवा- होटल सि प्रिन्स बाहिर एक युवा मृत अवस्थामा फेला परेका छन् । सिद्धार्थनगर-३ स्थित उक्त होटलबाहिर भुइँमा खसेको अवस्थामा ती युवा मृत भेटिएका हुन् । भैरहवा बसपार्क नजिकै रहेको होटलमा शुक्रबार राति ७ जनाको समुहमा युवाहरू बसेका थिए । समूहमा बसेका युवामध्ये एक जनाको मृत्यु भएको हो ।

मृतक २४ वर्षीय अमित यादव रुपन्देही कोटहीमाई ५ का बासिन्दा रहेको जिल्ला प्रहरी कार्यलय रुपन्देहीले जानकारी दिएको छ । होटल सञ्चालकका अनुसार माथिल्लो तल्लाबाट चोरी गरि भाग्ने क्रममा लडेर मृत्यु भएको हुन सक्छ ।

सँगै बसेका अन्य साथीमध्ये ४ जना प्रहरी नियन्त्रणमा छन् । २ जना राति नै भागेका हुन् । चोरी गरेर भाग्ने क्रममा होटलबाट खसेर मृत्यु भएको प्रारम्भिक अनुसन्धानबाट खुलेको छ । चोरी गरेर भाग्‍ने अवस्थामा माथिल्लो तलाबाट भुईमा खसेको देखिएको छ ।  घटनाबारे अनुसन्धान भईरहेको छ ।