सुर्खेतमा सात वर्षीया बालिका मृत भेटिइन्,  हत्याको आशंका

फाइल फोटो

सुर्खेत - चार दिनदेखि हराइएकी सुर्खेतकी एक बालिकाको शव फेला परेको छ । गुर्भाकोट नगरपालिका–५ बेतेनी की ७ वर्षीय बालिका ग्रीस्मा विकको शव फेला परेको हो ।

शनिबार हजुरआमासँगै गाउँमा भोज खान गएकी विक सोही दिन बेलुकाबाट हराएकी हुन् । उक्त दिन परिवारले आफन्तकोमा गएको होला भनेर खोजतलास गर्दा फेला नपरेपछि भोलिपल्ट प्रहरीकोमा खबर गरेको जिल्ला प्रहरी कार्यालय सुर्खेतका डिएसपी सुरज कार्कीले जानकारी दिए । 

उनकाअनुसार बालिकाको शव विकको घरदेखि एकसय मिटरको दुरीमा आज बिहान फेला परेको छ । चोट लागेको अवस्थामा बालिकाको शव फेला परेकोले उनको हत्या भएको हुन सक्ने अनुमान प्रहरीले गरेको छ । 

प्रहरीले शंकास्पद स्थानीय २० वर्षीय घनश्याम विकलाई अनुसन्धानका लागि हिरासतमा लिएको छ। प्रहरीले घटनाको स्थलगत रुपमा अनुसन्धान गरिरहेको बताएको छ । 

मृत अवस्थामा ७ वर्षीया बालिका फेला परेको र प्रहरी घटनास्थलमा अनुसन्धान गरिरहेको जिल्ला प्रहरी कार्यालय सुर्खेतका डिएसपी कार्कीले बताए ।

घटनास्थलमा प्रहरीले अनुसन्धान गरिरहेकाले पूर्ण विवरण नआईसकेको डिएसपी कार्कीले बताए । पोस्टमार्टमपछि हत्या भए नभएको रिपोट आउने उनले बताए ।