सिन्धुपाल्चोककाे सुकुटेमा भैरवकुण्ड स्प्रिङ्ग वाटरकाे उत्पादन सुरु

सिन्धुपाल्चोक। मुहानमै पानी प्रशोधन गरेर बजारमा लैजाने उद्धेश्यले स्थापना भएको भैरवकुण्ड स्प्रिङ्ग वाटर उत्पादन सुरु भएको छ । सिन्धुपाल्चोकको सुकुटे नजिकै स्थापना गरिएको यो कम्पनीले प्राकृतिक खनिजयुक्त पानी बजारमा ल्याउन थालेको हो ।

प्रशोधित मुलको पानीलाई मेशिनमार्फत भाँडोमा संकलन गरेर वजारमा लैजाने कम्पनीका सञ्चालक बिवश भण्डारीले जानकारी दिए । सिन्धुपाल्चोकको शुद्ध पानी आसपासका बजार र बनेपा,धुलिखेलका साथै काठमाण्डौंका उपभोक्तालाई खुवाउने उदेश्यले साँगाचोकगढी नगरपालिकाको अरनिको सडक नजिक यो पानी उद्योग स्थापना गरिएको छ ।

स्थानीय स्रोत साधनको सक्दो प्रयोग गरेर स्थानीय जनशक्तिकै प्रयोगमा पानी प्रशोधन गरेर वजारमा ल्याईएको भण्डारीले बताए । टाढादेखि बोतलमा धेरै दिनको पानी खान बाध्य रहेका उपभोक्तालाई यो उद्योगले ताजा पानी खुवाउने छ । मुहानमै स्थापना भएको उद्योग भएका कारण अरु पानी भन्दा यहाँबाट उत्पादित पानी स्वास्थ्यका लागि उपयुक्त हुने मापदण्डमा पर्दछ । सिन्धुपाल्चोककै युवा व्यवसायीकाे अगुवाईमा स्थापना भएको यो पानी उद्योगले स्थानीय स्रोत र स्थानीय जनशक्तिलाई प्राथमिकता दिएको सञ्चालक भण्डारीको भनाई छ ।