मोमिनुलले छाडे टेस्ट टिमको कप्तानी

काठमाडौँ – मोमिनुल हकले बंगलादेश टेस्ट क्रिकेट टिमको कप्तान पदबाट राजिनामा दिएका छन् । मोमिनुलले पछिल्लो समयमा रन बनाउन नसकेको भन्दै राजिनामा दिएको सञ्चार माध्यमले जनाएका छन् ।

३० वर्षीय मोमिनुलले सन् २०१९ को अक्टुबरबाट टेस्ट टिमको कप्तानको रुपमा रहेपनि उनले यस वर्ष खेलेका ६ खेलमा एक अर्धशतक सहित केवल १ सय ६२ रनमात्र बनाउन सकेका छन् । ​श्रीलंकाविरुद्धको दुई खेलको टेस्ट सिरिजमा १-० को पराजय भोग्दा मोमिनुलले केवल ११ रन बनाएका थिए ।

उनले आफूले रन बनाउन नसक्नु तथा टिमले खेल नजित्दा कप्तानी गर्न गाह्रो हुने बताए । मोमिनुलले कप्तान पदबाट राजिनामा दिनु उत्कृष्ट समय भएको समेत बताए । बंगलादेश क्रिकेट बोर्डले मोमिनुलको स्थानमा अर्को कप्तान भने अझै नियुक्त गरेको छैन ।