बन्द हुनुअघि मलेसियाको किनरारा ओभलमा तीन प्रतियोगिता हुने

काठमाडौँ – १८ वर्षदेखि मलेसिया क्रिकेट संघ (एमसीए) ले संचालन गर्दै आएको ऐतिहासिक किनरारा ओभल क्रिकेट मैदान बन्द हुने भएको छ । एमसीएका अध्यक्ष इकबाल अली कसिम अलीले जुन ३० तारिखमा मैदान खाली गरिने जनाएका हुन् । 

मैदान बन्द हुनुअघि किनरारा ओभलमा दुईवटा अन्तर्राष्ट्रियसहित तीन प्रतियोगिता आयोजना गरिनेछ । जुन १ देखि १० सम्म आईसीसी यू-१९ महिला विश्वकप छनोट तथा जुन १५ देखि २५ सम्म एसीसी महिला टी-ट्वान्टी एसिया कप च्याम्पियनशीप आयोजना हुनेछ । त्यसैगरी, जुन १० देखि तीनदिने टी-टेन कर्टेन कल च्याम्पियनशीप आयोजना हुनेछ । 

मैदानका मालिक पेरुमाहान किनरारा बीएचडीसँग आर्थिक लेनदेनमा विवाद उत्पन्न भएपछि एमसीएले मैदान छाड्नु परेको हो । 

सन् २००३ मा एमसीएले किनरारा ओभलका लागि १५ वर्षका लागि लिजमा लिने सम्झौता गरेको थियो । सन् २०१९ मा दुई वर्षका लागि सम्झौता बढाइएको थियो ।