विमान दुर्घटनाका परेका मृतकका परिवार त्रिभुवन विमानस्थलमा

फाइल फोटो

काठमाडौं - मुस्ताङमा तारा एयरको विमान दुर्घटनामा मृत्यु भएकाको शव काठमाडौं ल्याउने भएपछि मृतकका आफन्तहरू विमानस्थलमा जम्मा भएका छन् । 

शव ल्याइने भएपछि त्रिभुवन विमानस्थलको आन्तरिक टर्मिनलमा विमान दुर्घटनामा ज्यान गुमाएका व्यक्तिका परिवार जम्मा भएका हुन् । 

शवहरु पोखराबाट काठमाडौं ल्याएर पोस्टमार्टमका लागि त्रिवि शिक्षण अस्पताल लगिने  र त्यसपछि आफन्तको जिम्मा लगाइने जनाइएको छ । 

आइतबार बिहान ९ बजेर ५५ मिनेटमा पोखराबाट जोमसोमका लागि  १९ जना यात्रु र ३ जना चालक दलका सदस्यसहित २२ जना सवार विमान उडान भरेको केही मिनेटमै सम्पर्क विहीन भएको थियो। 

उक्त विमान सोमबार बिहान दुर्घटनाग्रस्त अवस्थामा फेला परेको थियो । विमान दुर्घटनाको कारण पत्ता लगाउन सरकारले पाँच सदस्यीय जाँचबुझ आयोग गठन गरेको छ ।