बलात्कार सम्बन्धी मुद्दामा हदम्याद हटाउन प्रतिनिधि सभामा संकल्प प्रस्ताव दर्ता

काठमाडौँ– बलात्कार सम्बन्धी मुद्दामा हदम्याद हटाउन प्रतिनिधि सभामा सांसदहरूले संकल्प प्रस्ताव दर्ता गराएका छन् । सत्तारुढ नेपाली कांग्रेसका चार सांसदहरू डा.डिला संग्रौला पन्त, प्रमिला राई, सुजाता परियार, रंगमती शाहीले हदम्याद हटाउन संकल्प प्रस्ताव दर्ता गराएका हुन् ।

संकल्प प्रस्तावमा पीडितले हदम्यादका कारण कानुनी प्रक्रियामा जान नसकेकाले यसलाई संसोधन गरिनुपर्ने माग गरिएको छ । ‘यदि कुनै पनि पीडितले हदम्यादका कारण कानुनी प्रक्रियामा जान नसकेको खण्डमा संविधानले व्यवस्था गरेका मौलिक हक नै औचित्यहीन हुन पुग्छ,’ संकल्प प्रस्तावमा भनिएको छ, ‘त्यसैले आम नागरिकको चासो र चिन्तालाई संवोधन गर्न, सरकारलाई आवश्यक दिशानिर्देश गर्न र समयमै कानून संसोधन गरि बलात्कारजस्ता जघन्य अपराधका पीडितलाई न्यायको मार्ग प्रशस्त गर्न लागि संकल्प प्रस्तुत गर्दछौँ ।’ 
सांसदहरूले संकल्प प्रस्तावमा मुलुकी अपराध संहिता २०७४ को दफा २१९ उपदफा २ मा रहेको उजुरी सम्बन्धी व्यवस्थालाई संसोधन गर्नुपर्ने बताएका छन् ।
‘मुलुकी अपराध संहिता २०७४ को दफा २१९ उपदफा २ मा रहेको उजुरी दिने हदम्याद सम्बन्धी व्यवस्थामा पीडितले उजुरी गर्न नसक्नुको भरपर्दो र मनासिव कारण देखाइ उजुर गर्न आएमा त्यस्तो उजुरी दर्ता गरी अनुसन्धान गर्न सक्ने गरि कानुन संसोधन गर्ने,’ संकल्प गर्नुपर्ने व्यहोरामा उल्लेख गरिएको छ ।