उदयपुरको कटारीमा ट्रक दुर्घटना : चार जनाको मृत्यु

काठमाडौँ - सिद्धिचरण लोकमार्गअन्तर्गत उदयपुरको कटारी नगरपालिका–१४ भदौरेस्थित चनौटमो सोमबार बिहान ट्रक दुर्घटनाहुँदा चार जनाको ज्यान गएको छ । मकवानपुरको हेटौंडाबाट मिक्सु सोलु हाइड्रोपावरको सिमेन्ट लोड गरेर सोलुखुम्बुतर्फ जाँदै गरेको ना ८ ख ८२९७ नम्बरको लोबेड ट्रक बिहान साढे दुई बजे दुर्घटना भएको हो । 

दुर्घटनामा ट्रकका चालक बाराको सिमरा–१ का ३५ वर्षीय सुजित घलान, सहचालक २५ वर्षीय नितेश खड्का, ट्रकमा सवार सिमरा–१ का १७ वर्षीय अनुज लामा र ३७ वर्षीय राजन तामाङको घटनास्थलमै ज्यान गएको जिल्ला प्रहरी कार्यालयका प्रहरी निरीक्षक मोहन थापाले बताए ।

प्रहरीको प्रारम्भिक अनुसन्धानबाट कच्चि सडकमा चालक निदाएका कारण ट्रक अनियन्त्रित भई दुर्घटना भएको खुलेको छ । ट्रक सडकबाट करिब एक सय मिटर तल खसेको छ । 

प्रहरीले स्थानीयको सहयोगमा शव बाहिर निकाल्ने प्रयास जारी राखेको छ । शव यत्रतत्र छरिएकाले उठाउने कार्य भैरहेको प्रहरीले जनाएको छ ।