लमजुङका सामुदायिक र निजी विद्यालयमा पाठ्यपुस्तक अभाव

फाइल फोटो

लमजुङ – जेठ १ गतेबाट नयाँ शैक्षिक सत्र सुरु भए पनि हालसम्म विद्यार्थीले पाठ्यपुस्तक पाएका छैनन् । लमजुङका सामुदायिक विद्यालयमा पाठ्यपुस्तक अभाव भएको हो । पाठ्यपुस्तकको अभाव हुँदा पठनपाठनमा समस्या भएको विद्यालयहरूको गुनासो छ ।

बेँसीसहर नगरपालिका-११ चितीमा रहेको जनकल्याण माध्यमिक विद्यालयका प्रधानाध्यापक अशोक श्रेष्ठका अनुसार आवश्यकता अनुसार विद्यार्थीले किताब पाएका छैनन् । पुस्तक पसलहरूमा किताब उपलब्ध नहुँदा विद्यालयसम्म ल्याउन सकिएको छैन । अघिल्लो वर्ष प्रयोग भएका किताबलाई ल्याएर पठनपाठन गर्न थालिएको छ । 

जेठ ४ गतेबाट पठनपाठन थालिएकोमा किताब अभाव भएकाले पाठ्यक्रम अनुसार अध्ययन गराउने र गृहकार्यमा केन्द्रित गरिएको बताए ।  अन्य कक्षाका विद्यार्थीलाई पुराना किताबमार्फत पठनपाठन गरिए पनि कक्षा ४, ७ र ९ को कोर्स परिवर्तन भएकाले समस्या भएको हो ।

विद्यार्थीहरूसँग भएका केही पुराना किताब र विद्यालयमा भएको पुराना किताबले पठनपाठन भइरहेको छ । जनविकास माध्यमिक विद्यालय बेँसीसहरका प्रधानाध्यापक रत्नमान श्रेष्ठले पुराना किताब खोज्ने र त्यसैबाट अध्यापन गराउने गरेको बताए । कक्षा ४, ७ र ९ बाहेकलाई पुराना किताबबाट पठनपाठन गरिएको छ । किताब उपलब्ध नहुँदा विद्यार्थी, शिक्षकलाई समस्या भएको उनको भनाइ छ । 

शिक्षा विकास तथा समन्वय इकाई लमजुङका प्रमुख वीरबहादुर गुरुङका अनुसार विद्यालयमा पाठ्यपुस्तक अभाव भएको विद्यालयले गुनासो गरेको बताए । 

निर्वाचनका कारण पुस्तक छपाइमा ढिलो भएको उनको भनाइ छ। लमजुङमा ०७८ सम्मको तथ्याङ्क अनुसार सामुदायिक विद्यालयतर्फ २५ हजार ८१० विद्यार्थी छन् । निजीतर्फ आठ हजार ४९२ जना छन् । सामुदायिक विद्यालय ३३६ वटा छन् । निजीतर्फ ३३ वटा विद्यालय छन् ।