बर्ड फ्लु नियन्त्रणमा

काठमाडौँः कृषि तथा पशुपंक्षी विकास मन्त्रालय अन्तर्गतको पशु सेवा विभागले माघ महिनादेखि काठमाडौँ उपत्यका र सुर्खेत तथा जाजरकोट जिल्लामा देखिएको बर्ड फ्लु रोग नियन्त्रणमा आएको जनाएको छ । 

बर्डफ्लु संक्रमण भेटिएका पंक्षी नष्ट गर्ने र रोग देखिएका र फैलन सक्ने क्षेत्रमा रहेका खोरहरू निस्संक्रमण (डिसइन्फेकसन) गर्ने कार्य अभियानका रूपमा अघि बढाइएको थियो । ‘चैत १३ गते निगरानीका क्रममा ललितपुर नगरपालिका वडा नं. १४ नख्खुमा पालिएका स्थानीय कुखुरा, हाँस र बट्टाइबाट संकलन गरिएको नमुना केन्द्रीय पशुपंक्षी रोग अन्वेषण प्रयोगशाला, त्रिपुरेश्वरबाट रियल टाइम पीसीआर (पोलिमरेज चेन रियाक्सन) विधिबाट परिक्षण गर्दा बर्ड फ्लु (एच५एन८) निदान भएको पाइएको छ,’ पशु सेवा विभागले भनेको छ । 

कृषि तथा पशुपंक्षी विकास मन्त्रालयका अनुसार बर्ड फ्लु नियन्त्रणमा लिन संघ, प्रदेश र स्थानीय तहबाट सम्बन्धित निकायहरू परिचालन गरिएको छ । 
संघीय सरकारबाट पशु सेवा विभाग, बागमती प्रदेशको भूमि व्यवस्था, कृषि तथा सहकारी मनत्रालय, पशुपंक्षी तथा मत्स्स्य विकास निर्देशनालय, भेटेनरी अस्पताल तथा पशु सेवा विज्ञ केन्द्रले समन्वयात्मक ढंगले काम गरिरहेको बताइएको छ । 

माघदेखि केही स्थानमा बर्ड फ्लु देखिएपछि सम्भावित फैलन सक्ने क्षेत्रमा रहेका सम्पूर्ण घरपालुवा पंक्षी र रोग सार्न सक्ने अन्य वस्तु समेत नष्ट गरी रोग नियन्त्रण गरिएको विभागको दाबी छ । यही क्रममा ५१६ हाँस, ८५४ स्थानीय कुखुरा, १५४ बट्टाई, ९४४ गोटा अण्डा, ३३५ केजी दाना सुरक्षित तवरले नष्ट गरिएको थियो । 

पशु सेवा विभागले पशुपंक्षी व्यवसाय गर्नेलाई आवश्यक सावधानी जारी राख्न आग्रह गरेको छ । फार्म परिसरमा जैविक सुरक्षाका विधि अपनाउने, खोरहरू निस्संक्रमण र व्यक्तिगत सरसफाइमा ध्यान दिन, घरपालुवा पशपंक्षीलाई जंगली पशुपंक्षीको समपर्कमा आउन नदिन र खुल्ला रूपमा पशुपंक्षी पालन निरुत्साहीत गर्न र अचानक पशुपंक्षीहरू अस्वभाविक ढङ्गले बिरामी परेका वा मरेको देखिएमा नजिकको पशु सेवा केन्द्रमा सूचित गर्न आग्रह गरेको छ । 

पशु सेवा विभागले पंक्षी तथा पंक्षीजन्य उत्पादनको ओसारपसारमा अनिवार्य रूपमा स्वास्थ्य परिक्षण गरी भेटेनरी प्रमाणपत्र लिनुपर्ने व्यवस्थालाई कडाइँका साथ लागू गरिएको जनाएको छ ।