पूर्वप्रदेश सांसद बुढाथोकी मेयरमा निर्वाचित

विराटनगर- प्रदेश १ को प्रदेशसभा सदस्यबाट राजीनामा दिएर मेयर लडेका गोपालचन्द्र बुढाथोकी झापाको मेची नगर नगरपालिकाकाको मेयरमा निर्वाचित भएका छन् । मंगलबार विहान सम्पन्‍न मतगणनाको अन्तिम परिणाम अनुसार नेकपा एमालेबाट मेयरका उम्मेदवार बुढाथोकीले २६ हजार ४७८ मत पाएर निर्वाचित भएका हुन् ।

मेची नगरमा गठबन्धनबाट मेयरका उम्मेदवार बनेका नेपाली कांग्रेसका इन्द्रबहादुर बुढाथोकीले २१ हजार ३११ मत प्राप्त गरेका छन् । झापाको निर्वाचन क्षेत्र नं. १ (ख) बाट निर्वाचित सांसद बुढाथोकीले मेची नगरको मेयर लड्ने भन्दै प्रदेशसभामा गत बैशाख ११ गते सभामुख समक्ष राजीनामा दिएका थिए ।

मेची नगरको उपमेयरमा पनि एमालेकै मीना कुमार पोखरेल निर्वाचित भएकी छन् । उनले २१५९० मत प्राप्त गरेकी हुन् । उपमेयरमा गठबन्धनबाट माओवादी केन्द्रका प्रकाश भण्डारीले १२ हजार ८१८ मत पाएका हुन् ।

मेची नगरका १५ वटा वडाहरूमध्ये नेकपा एमालेले ११ वटा वडाको वडाध्यक्ष जितेको छ । त्यस्तै नेपाली कांग्रेसले ३ र माओवादी केन्द्रले एउटा वडाध्यक्ष जितेको जनाइएको छ ।