भारतबाट आउने १० दिन अनिवार्य आइसोलेसनमा बस्‍नुपर्ने

काठमाडौँ : सरकारले दक्षिणी छिमेकी मुलुक भारतबाट नेपालतर्फ प्रवेश गर्नेलाई अनिवार्य १० दिन आइसोलेसनमा राख्‍ने निर्णय  गरेको छ । स्वास्थ्य तथा जनसंख्या मन्त्रालयले सीमावर्ती क्षेत्रबाट प्रवेश गरेकाहरूलाई आइसोलेसनमा राख्‍न सीमावर्ती जिल्लालाई निर्देशन दिएको हो ।
 
भारतीय सीमा क्षेत्रमा कोभीड-१९ पोजिटिभ भएकाहरू सार्वजनिक यातायातमा नै हिडेको पाइएपछि सरकारले यस्तो निर्णय लिएको हो  । उक्त क्षेत्रबाट नेपाल आएकालाई आइसोलेसनमा राख्‍न मन्त्रालयले निर्देशन दिएको हो । 

स्वास्थ्य मन्त्रालयले सबै प्रदेशका स्वास्थ्य निकायहरूलाई आइसोलेसन व्यवस्थापनका लागि निर्देशन दिँदै सरकारले यसमा निकै कडाई गर्नुपर्ने बताएको छ । 

सबै प्रदेशका सामाजिक विकास मन्त्रालय, स्वास्थ्य निर्देशनालय, स्वस्थ्य कार्यालयहरूको समन्वयमा कोभिडको लक्षण वा चिन्ह भएकालाई अस्पतालमा राख्‍नपर्ने समेत जनाएको छ । लक्षण नभएकालाई पनि अनिवार्य १० दिन आइसोलेसनमा राख्‍न निर्देशन दिएको हो । यो निर्देशनलाई सुरक्षाकर्मीको सहयोगमा पनि उपयोगमा ल्याउन आवश्यक पर्ने देखिन्छ । 

भारतमा कोभिड संक्रमण बढेसँगै सरकार त्यस्तो निर्णयमा  पुगेको हो  । यसअघि पनि भारतमा कोभिडको संक्रमण बढेपछि नेपालले सीमा क्‍वारेन्टीन नै बनाएर राखेको थियो । यद्यपि त्यो कार्यमा ढिलाइ हुँदा नेपालमा पनि संक्रमण बढेको थियो । अहिले भने बेलैमा सरकारले यस्तो निर्णय लिएर संक्रमण रोक्ने प्रयासमा चनाखो बनेको देखिन्छ ।

मन्त्रालयले प्रति दिन प्रति विरामी दुई हजार सोध भर्ना उपलब्ध गराइने पनि निर्देशनमा उल्लेख गरेको छ ।