मकवानपुरमा पहिलो पटक वडाध्यक्षमा महिला निर्वाचित

मकवानपुर– स्थानीय तह सदस्य निर्वाचन २०७९ अन्तर्गत मकवानपुरमा पहिलो पटक वडाध्यक्षमा दुई जना महिला निर्वाचित भएका छन् । मकवानपुरको बकैया गाउँपालिका वडा नं ५ र १० मा गठबन्धनबाट वडा अध्यक्ष उम्मेदवार बनेका नेपाली कांग्रेसका दुई नेतृ कमला वाईवा र लक्ष्मी जिम्बा विजयी भएर जिल्लामा इतिहास रचेका छन् ।

वडाध्यक्ष निर्वाचित जिम्बा र वाईवा दुबै जना २०७४ सालको स्थानीय तह निर्वाचनमा बकैया गाउँपालिकामा क्रमशः अध्यक्ष र उपाध्यक्षको उम्मेदवार थिए । तर दुवैले चुनाव हारेका थिए ।

मकवानपुर जिल्लामा रहेको १०२ वटा वडाहरुमा हालसम्म २ जना मात्रै महिला वडा अध्यक्षको रुपमा निर्वाचित भएका छन् । हेटौंडाको एउटा वडामा महिलालाई अध्यक्षको उम्मेदवार बनाइएकोमा मत गणना बाँकी रहेको छ ।

गत निर्वाचनमा गाउँपालिका उपाध्यक्षमा कांग्रेसको तर्फबाट उम्मेदवार बनेकी वाइवालाई पछाडि पार्दै एमालेको तर्फबाट उम्मेदवार बनेकी सरला बोलखे विजयी भएकी थिइन् । भने राप्रपाको तर्फबाट पालिका अध्यक्षको उम्मेदवार बनेकी जिम्बालाई कांग्रेसको तर्फबाट उम्मेदवार बनेका दामोदर खनालले जितेका थिए ।

यस पटक दुवै जनाले कांग्रेसबाट वडा ५ र १० को अध्यक्ष जितेका हुन् । राप्रपाबाट कांग्रेस प्रवेश गरेकी जिम्बालाई यस पटक गठबन्धनको साथ थियो । बकैया ५ वडाबाट अध्यक्षको टिकट पाएपछि उनले पालिका हाँक्ने योजनाले अब वडा बनाउने बताएकी थिइन् ।

अध्यक्ष र उपाध्यक्षको उम्मेदवार बनिसकेको भएपनि वडास्तरबाटै विकासको बाटो पहिल्याउन आफूहरु लागिपरेको उनीहरुले बताए । विजयी भएपछि पार्टीभन्दा माथि उठेर आफ्नो गाउँ र टोलको विकासमा लागिपर्ने जिम्बाले बताइन् ।

यता हेटौंडा उपमहानगरपालिकाको वडा ११ मा उम्मेदवार बनेकी अर्की महिला जुना दाहालको भने मतगणना बाँकी छ ।